Ақтауда үстел теннисінің үздіктері, ел чемпиондары Алан Құрмағанғалиев, Әнел Бақыт және Сарвиноз Миркадирова шеберлік сағат өткізді, - деп хабарлайды mangystaumedia.kz сайты.
Үстел теннисінен ел чемпионатында Әнел Бақыт топ жарған болатын. Ол шеберлік сағат аясында тәжірибесімен бөлісті. Теннисшілер дене қыздырудан бастап, алаңында тұру, ракетка ұстаудан жарыс барысында қандай әдіс-тәсіл қолдану керек екенін де көрсетті.
«Біз БКМ, Ментальды жаттығу және басқа да элементтермен бөлісіп, практика жүзінде көрсеттік. Қазіргі таңда барлық ауданда үстел теннисі үйірмесі бар. Ракетка ұстаған 500-ге жуық бала түрлі жарыстарда облыс намысын қорғап келеді. Ендігі мақсат – ұлттық құрамаға лайықты ізбасар дайындау», - дейді үстел теннисінен Қазақстан чемпионаты Әнел Бақыт.
Маңғыстаулық жастардың үстел теннисіне деген құлшынысы жоғары.
«Спортшылар жоғары деңгейге ұмтылу үшін жұмыс істеп жатырмыз. Федерация жас шеберлерге қолдау көрсетіп, аймақта үстел теннисін серік еткендер санын арттыруды көздейді. Сонымен қатар облыс орталығында республикалық жарыс өткізіп, арнайы үстел теннисі орталығын салуды жоспарлайды», - дейді МО үстел теннисі федерациясының президенті Ерболат Қожабаев.
Айта кетейік, өткен апта үстел теннисінен жасөспірімдер арасында облыстық чемпионат өтті. Оған 80 бала қатысты. Ақтау, Жаңаөзен қалаларымен қатар Мұнайлы, Бейнеу, Қарақия аудандарының теннисшілері де бақ сынады. Жалпы командалық есепте ақтаулық спортшылар топ жарды.
Жұлдызай ҚАЛИЕВА
Суреттер МО үстел теннисі федерациясынан алынды
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
