Жастар жылынан не күтеміз?

©

Біз Қазақстанның болашағы саналатын жастарды қолдауымыз керек. Жастар мен отбасы институтын кешенді қолдау мемлекеттік саясатының басымдылығына айналуы тиіс. Жастардың барлық санатын қолдауға арналған шараларды толық қамтитын әлеуметтік сатының ауқымды платформасын қалыптастыру керек. Келесі жылды «Жастар жылы» деп жариялауды ұсынамын.                                                                                                                          Н.Ә.Назарбаев

Биылғы жыл жастар үшін айрықша мәнді болатыны рас, жастардың қажеттіліктерін қамтамасыз ететін шараларға бөлінген қаржы ұлғайып, аймақтардағы инфрақұрылымның сапасы жоғарылайды, ал жастар мәселелері еліміздің барлық бағытының саясатында елеулі түрде ескеріліп, жас қазақстандықтарды қолдау жүйесі жетілдірілетін болады. Жолдау еліміздің әлеуметтік-экономикалық дамуының өзекті мәселелеріне және қазақстандықтардың әл-ауқатын одан әрі арттыру міндеттеріне арналды.

Ал сіз жастар жылынан не күтесіз? Жаңа мүмкіндіктерді асыға күтіп отырған жастарға қандай тың идеялар қоса аласыз? Осы сұрақтар төңірегінде сауалнама жүргізген болатынбыз. Қоғам пікірі төмендегіше өрбіді.

Еркін Мәжитов, аудандық білім бөлімі басшысының орынбасары:

- Жастар келешегіміздің негізі ретінде өз білімімен, жасампаз еңбегімен және күш-жігерімен өз болашағын құрудың жаңа мүмкіндіктерін алу қажет. Олар — еліміздің дамыған, бәсекеге қабілетті және әлемдегі сыйлы мемлекетті қалыптастыруды белсенді жалғастырушылар. Елбасымыздың 2019 жыл — жастар жылы деп атап көрсетуінің басты себебі осында жатыр. Қазақта “білекті бірді, білімді мыңды жығады“ деген аталы сөз бар. Бұл мақалдың өзі бүгінгі күні айрықша мәнге ие болып отыр. Бұл заман білекке емес, білімге сенетін заман. Әлемнің озық елдерінің қатарына енуді көздеген біздер алдымен білімімізбен оза шабуымыз керек. Бұл жөнінде Елбасымыздың халыққа арнаған әр Жолдауында түсінікті, әрі нақты айтылған. Мемлекетімізде жастарға қолдау тек осы жылы ғана емес, бұған дейін де болып келді. Олардың білімі, жұмысы, баспанасына дейін көңіл бөлінді. Осындай жағдайы жасалған елімізде өмір сүретін әр адамның балабақша жасынан бастап білімге құштар болуына алдымен ата-ана мен педагог жауапты. Осы тұста айта кететін тағы бір жәйт, Елбасы Жолдауында назар аударған маңызды мәселе — ол педагогтердің сапасы мен біліктілігін арттыру. Ол «Елді жаңғырту стратегиясын іске асырудың табыстылығы, ең алдымен қазақстандықтардың біліміне, әлеуметтік және дене болмысы, көңіл-күйлеріне байланысты», — деп білім беру саласын дамытудың қаншалықты маңызды екендігіне жұртшылықтың назарын аударды. Бұл орайда Н.Ә.Назарбаевпен мектеп жасына дейінгі балаларды оқыту мен тәрбиелеу, 12 жылдық оқыту моделі, кәсіптік және техникалық білім беру, жоғары білім берудің сапасы, интеллектуалды мектептер, жаңа халықаралық университет сынды орындар алға қойылды. Білім саласының қызметкерлерінің бүгінгі таңда жауапкершілігі мен маңызы күшейіп отыр.

Өйткені, сапалы білім беру елімізді индустрияландырудың және инновациялық даму жолына түсірудің басты алғышарты болып табылады. Білімсіз қоғамда прогресс, жаңа өрлеу мүмкін емес. Техника қарыштап дамыған заманда білімсіз күнің қараң. Өркениет көшіне бет бұрған қыруар істің алатын арқауы болып есептелетін ғылыми-техникалық және экономикалық прогрестің негізгі қозғаушы күші білім десек, қателеспейміз. Айтылған сөздерді қорыта келе жастар жылы жастарға берілген мол мүмкіндік деп білуіміз керек. Ойы ұшқыр, білімді, білікті жастар қашанда биікте болатынын ұмытпаң. Қашанда болашағын алыстан бағамдайтын қазақ «Қыстың қамын жаз ойла» демеуші ме еді… Ендеше Қазақстанның жарқын болашағы үшін қандай да бір іс тыңдыруға міндетті екенімізді естен шығармайық! Ел ертеңi — бiлiмдi жастар.

Аллаберген Қонарбаев, аудандық жастар орталығының басшысы:

- Мемлекет басшысының ұсынысымен 2019 жыл — жастар жылы деп жарияланды. Елбасымыздың бұл саясатының астарында еліміздің болашақта тізгінін жастардың ұстайтынын ұғындыру, еліне жанашыр азаматтарды тәрбиелеу бар. Біз еліміздің болашағы жастар деуден еш жалыққан емеспіз. Менің ойымша, осы жылы жастардың назарын рухани құндылықтарға аударуымыз қажет. Өйткені қазір жастар көбіне материалдық құндылықтарға басымдық беріп жатады. Жастарды азаматтық, қоғамдық жұмыстарға тартуымыз қажет. Ең бастысы, олардың өз құқы үшін күресе алатындай мүмкіндік қарастыру. Елінің болашағына жаны ашитын тұлғаны қалыптастыру балабақша қабырғасынан бастап әр адамның басты парызы болып есептелу керек. Аудандық жастар орталығында 2018 жылы біраз жұмыстар атқарылды  деп  айтсам,  қателеспеймін. Елбасымыздың «Болашаққа бағдар: рухани жаңғыру» мақаласын бағдар қылып, талай үлгілі істі атқардық. Орталықтағы еріктілер аудандағы жасы үлкен ардагерлерге, жалғызбасты аналарға, көпбалалы отбасыларға азық-түлікпен, басқа да қол көмектерімен көмектесті. «Үлкенге құрмет—кішіге міндет» демекші, қолғабыс етуден жалықпаған олардың ізеттіліктеріне ел сүйсінді. Елбасымыз ұсынған жастар жылы да осындай игі шараларға жастарымыз белсене қатысса екен дейміз. Жат қылық, жаман әдеттен аулақ болуға шақырамын. Өйткені, тағы да айтамын еліміздің болашағы – дені сау, білімді ұрпақтардың қолында.

Аққалам Дүйсембаева, ардагер ұстаз:

- Елбасымыздың ұсынған жастар жылын бәтуасы жоқ жиналыстар мен еш пайдасы жоқ форумдар мен флешмобтарға арнамау керек. Керісінше “2019 жылы не бітірдік?” деп есеп бергенде ауыз толтырып айтарлықтай істердің атқарылатын уақыты келді. Жастарды аудиторияға жинап алып, маңызы жоқ форумдар өткізуге қарсымын. Мені сондай жиындарға жиі шақырады, ұялғаннан барамын. Жасымыз келген адамбыз, көргенімізді, көкейге түйгенімізбен бөлісейік деп барсақ та іш пыстырарлық жиындардан жастар ештеңені тыңдап та жарытпайды. Сондықтан ондай форумдардың тиімділігін көрмедім. Жастармен жұмыс істеудің форматын түбегейлі өзгерту керек. Себебі бүгінгі жастың ақпаратты қабылдау қабілеті мүлде бөлек. Биыл жастарға артылған сенім мен мүмкіндік ұшан-теңіз. Мұндағы жауапкершілік, алға қойған мақсатқа қол жеткізу үшін олар барлығына да дайын болу керек. Ол үшін тың жобалар, креативті идеялар, қызықты шаралар бастама ретінде жастардан шығуы қажет.

Айгүл РАХМЕТОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.