Бас қалада білім алғанымды мақтан етемін

Бүгінде бүкіл әлем сұлулығына тамсанып, талайға таңдай қақтырған Астана – тәуелсіз мемлекетіміздің дидары, халқымыздың мерейі. Ерке Есілдің жағасындағы бой түзеген әсем қаламыз жаңа ғасыр ғажабынан жаралған жас қала. Астана - талабы таудай жастарға жол ашқан қала. Жас ұрпаққа жарқын болашақ сыйлаған құтты мекен. Арман құшып келген әрбір азаматқа жол нұсқаған қасиетті өңір. Бір сөзбен айтқанда, жасампаз жастардың қаласы.

Тарихы мен табиғаты, сәулеті мен бүкіл тіршілігі дара, ғажап үлгілі күйіміздің күмбірі, көңіліміздің жыр - гүлі Астанада оқуды бала кезден арман еттім. Сөйтіп 2012 жылы қиялыма ерік беріп, бала арманымды арқалап, мақсат қуып, болашақтың қаласындағы Еуразия гуманитарлық институтының қазақ филологиясына оқуға қабылданып, студент атандым. Маңғыстаудың маң даласынан Сарыарқаның атырабына үмітін үкілеп келген асқақ арманды қызға жас мемлекеттің жаңа ордасы құт бола білді. Есілдің ерке толқынында тербелген еңселі елордамыздың көз алдымда күннен-күнге көркейгенінің куәсі болдым. Осы төрт жылдың ішінде елордамыз еңсемді тіктеп, қанатымды қатайтты. Даму динамикасына ілесуді үйретті.

Алғаш келген жылдары әдемілікке аузым ашылып, таңырқап қарап жүретінмін. Ауылдан әр демалыстан келген сайын Астананың тағы бір жаңа нысанға, жаңа үйлермен толыққанына сүйсіне қарайтынмын. Әсіресе түнгі Астананы айтсаңызшы?! Қандай әдемі, қандай әсем!

Басқа қалалардан ерекшелігі сол - онда әдемі зәулім үйлер, Есіл өзенінің жанында орналасқан Үкімет пен Парламентке арналған әкімшілік ғимараттары, Хан шатыры, мәдениет сарайлары, спорт кешендері, "Өмір өзені" атты су бұрқақтары, Конгресс Холл, театрлар мен Абай мен Кенесары атамыздың ескерткіштері, Бәйтерек монументі, көшедегі гүлзарлар мен алаңдары да өте керемет үйлесім тапқан. Бұл біздің білетініміз ғана десем, болады. Қазіргі Астананың көз тоймастай көркіне, жылдан-жылға әсемденіп, өсіп келе жатқанына әрбір ауыл баласы қызыға қараймыз. Астананың Астана болғанына Елбасы Н.Ә.Назарбаевтың еңбегін айтпай кетуге болмас. Ол кісі Астананы жаңаша гүлдендірді.

Бүгін, міне, әлем көз тігіп отырған Астанамыз бозбала жастан өтіп, кемелденер жасқа келіп отыр. Еліміздің жүрегі – елордамыздың келешегі кемел екеніне кәміл сенемін…Туған күніңмен, Астана!

Гүлжайнат ШЫҢДЫБАЕВА, Н.Жұбаев атындағы орта мектептің әлеуметтік педагогі

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.