Кездесу қонақтары – Астананың құрдастары

«Жас уақытта көңіл гүл».                                             Абай Құнанбаев

«Жасында тырысқан – қартайғанда қуанады».                                                                           Махмұд Қашқари

Ал Ұлт көшбасшысы Н.Ә.Назарбаев жастарға қарата айтылған бір сөзінде «Сендердің бәрің лайық­ты өмірдің, әл-­ауқаттың, жаңа өмір сапасына қол жеткізудің тек еңбек арқылы ғана келетінін есте сақ­тауларың керек», – дегені бар еді.

Иә, расында да, қазір бой жа­рыстыратын емес, ой жарыстыра­тын заман. Мектепте бестікке оқып, білім қуып, сауатын толықтырудың қамын жасаған адам ұтылмайды. Керісінше ондай перзент ата-­анасының мақтанышы, достарының ақылшысы, қоғамның пайда кел­тіруші бір тұлғасына айналады.

Мұнайлы ауданы әкімдігінің кіші мәжіліс залына елордамыз – Астана қала­сының 20 жылдық мерейтойына арнап шақырылған Астананың төл құрдастары Мұнайлы ауданының ең белсен­ді жастары деуге болады. Олар уақытында оқуды абыройлы тә­мамдап, бүгінде әрқайсысы әр жерде жұмыс істеп, кейбірі жоғары оқу орындарында әлі студент. Сту­денттерді көріп, өзімнің студент шағым ойға оралды. Арман қуып, біз де айбарлы Алматыны бетке алып кете барғанбыз. Уыздай жас­пыз. Әл-­Фараби атындағы ҚазҰУ­-нің журналистика факультетіне оқуға түстім. «Сен тұр, мен ата­йын» дейтін дарынды, ізденімпаз, жан-­жақты құрдастарымызбен теңдесуге тырыстық. Жанталасқан өмір. Ол жақта жүріп бір сүйсінге­нім – қоғамдық көліктерде отырып, кітапқа шұқшиғандар көз тартады. «Болар бала жасынан, жөргегінен» демей ме халқымыз?! Бұл да бір уақыт өлтірмеудің керемет амалы. Алып шаһардың орталық кітап­ханаларында лық толған адам, бәрі бірдеңені білгісі кеп жүр, көз жеткізгісі кеп жүр, көкірек көздерін ашқысы кеп жүр, қараңғылықтан шыққысы кеп жүр, қысқасы, руха­ни байығысы кеп жүр. Түрік жазу­шысы Назым Хикметтің сөзімен айтқанда «Мен жанбасам лапыл­дап, сен жанбасаң лапылдап, біз жанбасақ лапылдап, аспан қалай ашылмақ», – деп жүр.

Мұнайлы ауданы әкімі Нұрлан Тәжібаев кездескен Астана құрдастары ла­пылдап тұр. Бәрі де сөйлегісі кеп, ауданның гүлденуіне қатыс­ты пікір, ұсыныстарын жеткізуге асықты. Аудан басшысы осыны сезгендей жастармен әуелі таныс­тық орнатып, бірте-­бірте әңгімеге араластырып отырды.

Нұрлан Төлегенұлы жастардың талап-­тілектері ескерусіз қалмай­тындығын айтып, мереке құрметіне орай хакім Абай шығармалары­ның жинақтарын сыйлыққа тартты. «Сыйға – сый» дегендей, жалынды жастар да өз аттарынан елорда­ның ең көрнекті ғимараттарының бірі «Бәйтерек» бейнеленген үстел мүсіндерін сыйлады.

«Жүрегім менің – Астана» тақы­рыбымен өткізілген аталмыш жиын­ға Маңғыстау облыстық жастар саясаты мәселелері басқармасы­ның басшысы Б.Тұяқов, Маңғыстау облыстық жастар ресурстық орта­лығының директоры Д.Жеткізген, Мұнайлы ауданы әкімінің орынбасары Б.Бі­ләлов, аудандық ішкі саясат жә­не тілдерді дамыту бөлімінің басшысы С.Ноғаева, аудандық жастар ресурстық орталығының директоры Гүлмира Себепбаева қатысты. Қатысушылар жиырма жыл дегеніңіз тарих үшін қас-­қа­ғым сәт болғанымен, осынау аз ғана жылдың ішінде елордамыз дәулеті тасып, сәулеті асқан жер жаһандағы сұлу шаһарлардың бі­ріне айналғандығын сөз етісті.

Әсел ТАҢАТАРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.