Ерлік жоққа шығарылмайды

©

Қазақ халқы Ресей империясына тәуелді болған 260 жыл ішінде қаншама қасіретті жылдарды бастан кешірді. Ашаршылық, қуаңшылық, жазықсыз жазалау, жер аудару, ҰОС соғысы мен бертіндегі Ауған жеріндегі қанды жылдар қаншама қазақтың өмірін жалмап, талайының тағдырларын тас-талқан еткені белгілі. Соның ішінде, Ауған жеріндегі Одақ әскерлерінің он жылдан астам болып, талай боздақтың өмірін жалмаған соғыс жайында Елбасы Н.Назарбаев «Ауған соғысында қыруар қаржы шығындадық, мыңдаған өмір қиылды, бәрібір Кеңес әскеріне бұл елді тастап шығуына тура келді. Халық үшін бұдан асқан қасірет бар ма?» деп баға берген болатын. Бірақ қазіргі таңда бұл саясатты дұрыс, не бұрыс дегенімізбен Отан алдындағы борышын абыроймен атқарған сардарлар мен сарбаздар ерлігі жоққа шығарылмайды, олар қашан да ел есінде болмақ.

Бүгінгі таңда, Жаңаөзен қаласында Ауған соғысынан аман оралған азаматтардың басын біріктіріп, олардың қоғаммен байланысын арттыру мақсатында Ауған соғысы ардагерлері қоғамдық бірлестігі жұмыс жасап келеді. Жалпы бұл бірлестік 2003 жылы 14 тамызда құрылып, төраға қызметін Оразалы Әділов атқарған. Кейін 2013 жылдан бастап төрағалық қызмет Сәтбай Құлсариевке тапсырылады.

- Негізі, бұл бірлестік құрылмастан бұрын Ауған соғысы ардагерлері бейресми түрде қызмет етіп келді. Жасаған жұмысымыз бен мақсатымыз әрқашан елге көмектесу, жастарға үлгі болу, біз көрген соғысты бізден кейінгі ұрпаққа көрсетпеу, ол үшін жас буынды отансүйгіштікке, еңбекке тәрбиелеу, бейбіт елде өмір сүріп жатқан бақытты ұрпақ екенін ұғындыру, саналарына сіңіру, - дейді С.Құлсариев.

Аталған бірлестікте 190-ға жуық Ауған соғысының ардагері тіркеулі. Олардың 60-тан астамы мұнай саласында қызмет етсе, жұмыссыз жүрген ардагерлер де жоқ емес. Қоғамдық бірлестік аты айтып тұрғандай қоғамдық жұмыстарға, Жаңаөзен қаласындағы қайырымдылық, сенбілік, танымдық, патриоттық, спорттық іс-шараларға атсалысып келеді. Халықтың, соның ішінде жастардың салауатты өмір салтын сақтап, есірткі, ішімдік, темекі секілді зиян әдеттерден жат болуы, бұзақылық, қылмыстан аулақ жүруі, ең болмаса бір шыбық отырғызып қаласына пайдасын тигізіп, білімге, өнерге құштар болуы үшін үлкен септігін тигізер дөңгелек үстелдер, кездесулер, жүгіруден марафондар, басқа да спорт түрлерінен жарыстар өткізіп отырады.

- Біз жастармен үнемі жұмыс жасаймыз. Оқушыларды, студенттерді жинап, олармен әңгімелесу шараларын өткіземіз. Жасаған ісі, ерлігі, батырлығы үлгі болар ардагерлерді қатыстырып, олардың өмір жолының қиындығы мен қызығын мысалға келтіреміз. Мұның барлығы жастарды мойымауға, жігерлендіруге септігін тиігізеді. Сондай-ақ, өткен жылдан бастап дін бағытында кездесулер, дөңгелек үстелдер ұйымдастыра бастадық. Мұнда міндетті түрде қасымызға мешіт имамдарын, теологтарды ерте жүреміз. Дәстүрлі исламның қандай болатындығы жайлы толыққанды ақпарат беріледі. Жалпы, біздің жасаған жұмыстардың барлығы адамның білімін толықтырып, өмірге деген көқарасын оң бағытқа өзгерту болып табылады, - дейді С.Құлсариев.

Ауған соғысы ардагерлері қоғамдық бірлестігі іс-шараларға халықты тартып қана қоймай, өздері де қатысып, талай үлгі болар істің басын қайырған. Жыл сайын бірлестік мүшелері жағалауды тазарту және халыққа жақсы демалыс ұйымдастыру мақсатында Каспий теңізі айналасын тазалау жұмыстарын жүзеге асырып келеді. Жаз мезгілінде бірнеше рет таңертеңнен кешке дейін теңіз маңында тұрғындардың ластаған жерлерін, тастаған ыдыстарын жинап, қалаға қапшық-қапшық қоқыс тиелген бірнеше «КаМаз» жүк көлігімен қайтады. Ардагерлер сенбілік шараларымен де үнемі көзге түседі. Олар тек ауа-райының қолайлы уақытында ғана емес, жаңбырға қарамай шыбық отырғызу, ағаш түптерін қопсыту т.б. жұмыстарын жасаған.

Бұдан бөлек, бұл азаматтар қайырым жасау, әлеуметтік жағдайы төмен отбасыларға көмек көрсету секілді шапағытын тигізер іс-әрекеттерден де ада емес. Қоғамдық бірлестік тарапынан үнемі тұрмыстық жағдайы төмен отбасыларға азық-түлік таратылып, «Мектепке жол» акциясы аясында біршама бала оқу-құралдармен қамтамасыз етіледі. Өздері құрған «Халықтан халыққа» атты бағдарламасы аясында алғаш рет Жаңаөзен қаласында қайырымдылық дүкенін ашып, киім-кешекке зәру адамдарға тегін киім-кешек алуына жағдай жасады. Бұл дүкенге кез-келген адам таза, бүлінбеген, өлшемі келмей қалған киімдерін тапсыруларына болады. Қайырымдылық дүкен «Ардагерлер үйінің» екінші қабатында орналасқан.

- Шараларды әртүрлі мекемелермен бірлікте және өздеріміз өткіземіз. Егер шараға қаражат қажет болса өз қалтамыздан, не демеуші болатын мекемелерді іздестіреміз. Бізге көбінесе «Өзенмұнайгаз» АҚ, «Өзенмұнайсервис» ЖШС, «Бұрғылау» ЖШС мекемелері қолдау көрсетеді, - дейді С.Құлсариев.

Жалпы қоғамдық бірлестіктің Жаңаөзен қаласы үшін, қоғам үшін, жасаған жұмыстары аз емес. Олардың жарқын істері, қоғамдық жұмыстарға белсенділіктері миллиондарға пайдасы тимесе де, мыңның, жүздің, тіпті бірдің игілігіне жарап жатқаны анық.

 Жазира АҚБЕРГЕНОВА

Сурет Т. Құсайынның архивінен

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.