Тоғжанов Жаңаөзендегі медициналық орталықтарды аралады

Алдағы жылдың мақсат-міндеттерін айқындап, өткен жылды қорытындылап, атқарылған жұмыстар легімен бұқараны таныстыратын барлық деңгейдегі әкімдердің есеп беруі Жаңаөзен бойынша қаңтар айының 21-ші жұлдызынан бастау алған болатын. Жаңаөзен қаласына іргелес Қызылсай, Теңге, Рахат ауылдары мен қалалық қоғамдық кеңес алдында өткен есептік кездесулердің нүктесі осы аптада қойылды. 1 ақпан күні қала әкімі Әділбек Дауылбаев «Мұнайшы» мәдениет үйінде жаңаөзендіктер алдында бір жыл бойы шешімді істері мен шешілуі тиіс түйткілдерді көппен бірге талқыға салды. Қала әкімінің есеп беруіне Маңғыстау облысының әкімі Ералы Тоғжанов пен облыстың мемлекеттік мекемелерінің өкілдері қатысты. Облыс басшысы жиыннан бұрын қаладағы екі бірдей нысанға соғып, жұмыс барысымен танысып шықты. Алдымен 50 орындық стационары бар «Өзенмұнайгаз» АҚ медициналық мекемесінде болып, үш қабатты ғимаратты аралады. Аталмыш нысан 2015 жылдың қазан айынан бастап тоқтап қалған болатын. Ендігі күні осы әлеуметтік нысан толығымен аяқталып, халық игілігіне берілуі үшін Ералы Тоғжанов «ӨМГ» АҚ Күрделі құрылыс жөніндегі басқарушы директор Бисен Ратов пен тағы бірнеше жауапты азаматтарға нақты тапсырмалар берді. Медициналық мекеменің толық бітуіне қажетті соманы қайта қарап, ықшамдап, құрылыс жұмыстарын бастап, жыл аяғына дейін талапқа сай қолданысқа берілуін тапсырды. Осы орайда Б.Ратов жұмыстардың нақты орындалу тәртібі жайында мәліметтерді ақпан айының 10-на дейін әзірлеп, ішкі құрылыс жұмыстарын толығымен 2020 жылдың бірінші жартыжылдығына дейін аяқтауға болатынын жеткізді. Жыл соңына дейін аяқтау үшін құжаттары мен қаржы бөлу мәселесі уақыт алуы мүмкін екенін назарға берді. Жоспарға сәйкес «Өзенмұнайгаз» АҚ жобаның ЖСҚ қайта жасақтап, мемлекеттік сараптамадан өткізіп, құрылысы аяқталмаған нысан ЖСҚ-мен облыстық денсаулық сақтау басқармасының балансына беріледі. Содан соң «Өзенмұнайгаз» АҚ әлеуметтік міндеттемелер шеңберінде 2019 жылға өңірдің инфрақұрылымын дамытуға берілетін қаржы лимитіне қосымша қаржы бөліп, бұл қаржы облыстық денсаулық сақтау басқармасы арқылы нысанның құрылысын аяқтауға жұмсалатын болады. Жоспар бойынша нысан сенімгерлік басқару немесе мемлекеттік-жекешелік әріптестік механизмі арқылы инвестрдың қаржыландыруымен медициналық құрал- жабдықтармен қамтамасыз етілетін болады. Медициналық мекеменің жалпы құны 4 276 830,13 мың теңгені құрайды, яғни бұл қаражат медициналық, ас үй  және техникалық жабдықтармен қамтуға қаралған.  Қазіргі таңда 1 303 362,95 мың теңге игерілген, қалған сомма 2 973 467,18 мың теңге құрап отыр. Нысанның толық аяқталуы үшін шамамен 3 704 767,48 мың теңгедей қаржы қажет болады деп болжалуда. Бұдан кейін облыс басшысы Ералы Тоғжанов бастаған топ қаладағы орталық ауруханада болды. Мұнда ғимараттың екінші қабатынан ми-жүрек ауруларын емдейтін орталық ашылады деп жоспарлануда. Бұл жөнінде орталық аурухана басшысы М.Сариев пен облыстық аурухана дәрігері Қобылан Жариев айтып өтті. Е.Тоғжанов ашылатын орталық жайымен танысып, белгіленген уақыттан кешікпей ашуды міндеттеді. - Мемлекеттік-жекешелік әріптестік аясында Жаңаөзен қалалық орталық ауханасының екінші қабатын жалға алып, жүрекке ота жасайтын орталық ашамыз деп ниеттеніп жатырмыз. Бірінші этапта жүрекке жабық түрде ота жасаймыз, жыл аяғына жақын жүрекке ашық түрде ота жасаймыз деп жоспарлап отырмыз. Бұл ойымыздың жүзеге асуына 300 млн-ға шамалас қаражат қажет, оның 260 миллионы аппараттың бағасы. Қаражаттың 80%-ы инвесторлардың жеке инвестициясынан, 20%-ы «Нұр капитал» бағдарламасынан болмақ. Жылына 1500-2000-ға дейін зерттеу тексеру жұмыстарын жасаймыз деген ойымыз бар, - дейді Қ.Жариев. Ми-жүрек ауруларын емдейтін орталықта  20 медициналық қызметкер, яғни 8 дәрігер, 10 шақты медбике қызмет ететін болады. Мамандар Астана, Алматы секілді еліміздің үлкен қалаларынан шақыртылып жатыр. Қазіргі таңда, олармен келісім жасалған, үймен де  қамтамасыз етеміз деп отыр. 12 ақпан күні облыстық әкімдікпен келісім-шарт жасалса, жөндеу жұмыстары бірден басталмақ. Ал, орталықтың жұмыс жасау мерзімі шетелден келетін аппараттың келуімен тығыз байланысты. Бір жарым ай ішінде жеткізілетін аппарат уақытында келіп жетсе, мамыр айының басында жұмыс жасау кезделіп отыр.

Жазира АҚБЕРГЕНОВА Суреттерді түсірген Серік МАЙЕМЕРОВ

[gallery td_select_gallery_slide="slide" ids="70879,70877,70874,70880,70876,70873,70875,70878"]