Діни сауаттылық - қоғам қауіпсіздігі

Діни экстремизм мен терроризм көрінісі әлем елдерінің ортақ мәселесі. Сол себепті, жер бетіндегі адамзатқа зиянын тигізіп отырған мұндай дін атын жамылушы ұйымдар, топ­тармен күрес жүргізу, ақпараттық-насихаттық жұмыстарда азаматтарды көптеп қамту, деструктивтік және экстремистік діни ағымдардан зардап шеккен азаматтарды оңалту секілді іс-шаралар тұрақты түрде ұйымдастырылып отыру қажет. Өйткені, бірінші кезекте мұндай діни ағымдарға ерушілер де, зардап шегушілер де құқықтық сауатсыздықтары кесірінен тап болып, құрбандыққа айналып жатады. Осы мақсатта 25 қазан «Бастау» қонақүйінде «Деструктивті діни ағымдардан зардап шеккен тұлғаларға оңалту және бейімдеу жұмыстарын жүргізетін мамандарды оқыту» тақырыбында семинар өтті. Бір күндік семинар Жаңаөзен қалалық ішкі саясат бөлімі «Дін мәселелері бойынша ақпараттық-талдау орталығы» коммуналдық мемлекеттік мекемесінің мемлекеттік әлеуметтік тапсы­рысы аясында жүзеге асырылды. Алматы қаласынан «Нұр Мүбарак» Египет ислам мәдениеті университетінің аға оқытушысы, республикалық АТТ мүшесі, исламтанушы, білікті теолог Ризабек Батталұлы арнайы шақырылып, діннің жастарға әсері, халықты деструктивті діни ағымдардан қорғау, радикалданудың себептері мен алдын алу тәсілдерін кеңінен қамтыды. Сондай-ақ, қоғамға жат құбылыстан тек қана діни сауаттылық арқылы сақтануға болатыны жеткізілді. Деструктивті діни ағымдардың теріс идеяларына мықты иммунитет қана қарсы тұра алатыны айтылды. Ол үшін, әрине дін саласындағы сауатты көтеру негізгі күрес құралы болып есептеледі. - Маңғыстау өлкесіне биылғы жылдың өзінде осымен екінші мәрте келуім. Жылдың ортасында «Жусан операциясына» байла­нысты елге оралған адамдармен оңалту ша­ралары ретінде екі күндік дәріс болды. Осыретте Жаңаөзен қаласына деструктивті діни ағымдардардың алдын алу, олардан сақтанудың жолдары және осы салада қызмет атқарып жатқан теологтарға әдіс тәсілін түсіндіруге келіп тұрмын. Жалған діни ұйымдар мен радикалдық ағымдардың анықтамасы, белгілері арқылы анықтау, теріс идеяларына қарсы тұру мақсатында мамандардың біліктілігін көтеруге бағытталды, - деді Ризабек Батталұлы. Семинарға деструктивті діни ағымдардың тәуелділігіне түскен азаматтарды оңалту бойынша және азаматтардың жат ағымдардың жетегіне кетпес үшін құқықтық, психологиялық, дінтанулық кеңес беретін қаладағы мекемелерден тағайындалған мамандар қатысты. Дін мәселелері бойынша ақпараттық-талдау орталығының директорының орынбасары Нұрсәуле Қойлыбаева бұл шара ҚР-да діни экстремизм мен тер­роризмге қарсы іс-қимыл жөніндегі 2018-2022 жылдарға арналған мемлекеттік бағдарламаның іске асыру мақсатында өткізіліп жатқанын тілге тиек етіп, жыл соңына дейін осы бағытта тағы бір шара ұйымдастырылатынын жеткізді.

Жазира АҚБЕРГЕНОВА