Жаңаөзенде ағылшын тілі кабинеті ашылды

Бүгінгі таңда мемлекет тарапынан мүмкіндігі шектеулі жандар үшін көптеген бағдарламалар жасақталып, жұмыстар жүріп жатыр. Ең бастысы мүгедек балалар­ды сәби кезінен бастап анықтап, олардың ортаға бейімделуіне жағдай жасау керек. Жалпы баланы қоғамға бейімдеу мен оқытуда ерте диагностикалау мен түзету маңызды. Мүмкіндігі шектеулі, мүгедек балалар тәрбиесіне ерекше мән берілуі керек. Бұл тәрбиенің негізгі мақсаты еңбекке үйрету, өмірде өз орнын табуға баулу, өмірге икемді жеке тұлға қалыптастыру. Ең алдымен тәрбие ісіне терең сезім қажет. Тәрбиеге нағыз сенім бар жерде ғана, нағыз талапшылдық еңбек тәртібі болады. «Еңбек, еңбек - бәрін жеңбек». Осы бір мақалдың ішіне барлығы сиып тұрғандай. Жақында Жаңаөзен қаласындағы оқушылар шығармашылық үйінде мүмкіндігі шектеулі балаларды оқытуға арналған ағылшын тілі кабинеті ашылды. Игілікті шараның ашылуына қала әкімінің орынбасары Ғалым Байжанов, қалалық білім бөлімінің басшысы Ысқақ Құлатай, ұстаздар, ата-аналар мен балалар қатысты. Шара барысында Ғ.Байжанов құттықтау сөз алып, бүгінгі қоғамда ағылшын тілін меңгеру маңызды екенін ай­тып, балалардың оқуына сәтттілік тіледі. Салтанатты шараның лентасын Динара Ты­нымбай қиған соң, ата-аналар мен балалар кабинетке кіріп, алғашқы сабағын бастап кетті. Балаларды оқытатын ағылшын тілінің мұғалімі Сандуғаш Дегениязова күлімдеп қарсы алып, ағылшын тілінде балаларға сабақты түсіндірді. Сабақ аптасына екі рет өткізіледі. Кез келген адам қоғамның толыққанды мүшесі болуы үшін кәсіби білім алуы ке­рек. Еліміз мүмкіндігі шектеулі жандарға көмек беруден аянған емес. Білім алуға, түрлі әлеуметтік көмектерге ие болып, мемлекеттік бағдарлама мен жобаларға қатысуына шектеу жоқ.

Дарина АҚБЕРЕН