Елбасы Н.Ә.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты халыққа Жолдауына орай Жаңаөзенде қала активінің мәжілісі ұйымдастырылды. Жиын Оқушылар шығармашылық үйінде қала әкімінің орынбасарлары, облыстық және қалалық мәслихаттарының депуттатары, мемлекеттік мекемелер мен кәсіпорындар басшылары, ардагерлер т.б. қатысуымен өтті.
Жолдаудың негізгі бағыттары мен одан туындайтын міндеттері жөнінде Жаңаөзен қаласының әкімі Әділбек Дауылбаев сөз алды. Әкім Жолдауда айтылған мақсат-міндеттер жұмыс жоспарына енгізіліп, қаламыздың дамуына бағытталатынын жеткізді.
- Елбасы Жолдауда қарапайым халықтың әл-ауқатын жақсартуға бағытталған мемлекеттік саясаттың басымдықтарын ерекше атап өтті. Сондықтан Сіздермен Жолдауда туындайтын міндеттерді айқындау үшін басқосып отырмыз, - деді қала әкімі.
Ә.Дауылбаев Президент халықтың әл-ауқатының өсуі ең алдымен табыстардың тұрақты өсімі мен тұрмыс сапасына байланысты екенін нақтылағанын, бұл үшін алдағы жылдың 1 қаңтарынан бастап ең төменгі жалақы мөлшері 1,5 есеге, яғни 28 мыңнан 42 мың теңгеге дейін артатынын жеткізді. Жаңаөзен қаласы бойынша бюджеттік салада 7226 адам қызмет етсе, олардың еңбекақылары орта есеппен 35%-ға өседі деп күтілуде. Бұған байланысты сала мамандары есептеу жұмыстарын бастап кеткен. Бұл тұрмыстың жақсаруына үлкен әсер етеді деген сөз.
2010 жылы «Бизнестің жол картасы – 2020» мемлекеттік бағдарламасы іске қосылған болатын. Аталмыш бағдарламаның тиімділігі ескеріліп, 2025 жылға дейін ұзарту ұсынылды. Осындай пайдалы бағдарламалар арқасында қаламыз бойынша кәсіпкерлікпен айналысам деушілер саны артып, әкімшілік кедергілер қысқарып, салықтық жеңілдіктер заңды тұрғыда қарастырылған. Шағын және орта бизнесті қолдау мақсатында төмен пайыздық несие ұсынатын «Нұр капитал» жобасы республика бойынша тек қана Маңғыстау өңірінде жүзеге асырылып, жаңаөзендіктер облыс бойынша едәуір қаражатқа ие болған. Нақты айтар болсақ, облыстық үйлестіру кеңесінің шешімі негізінде 686 млн. 800 мың теңгеге 31 кәсіпкерлік жоба мақұлданған. Мұндағы кәсіпкерлік бағыттары күнделікті тұрмысқа қажетті өнімдерді өзімізде шығаруға негізделіп, жергілікті тұрғындарды жұмыспен қамтуға атсалысады.
Жолдаудағы экономикада бәсекелестікті дамыту және тұрғын үй-коммуналдық шаруашылығы мен табиғи монополиялардың қызметі үшін белгіленетін тарифтер саласында тәртіп орнату мақсатымен батыл шаралар қабылдау керек деген міндетіне орай облыс әкімі Ералы Тоғжанов облыс бойынша орналасқан 15 монополиялық компанияға, олардың инвестициялық бағдарламалары тарифтерге негізделуі тиіс екендігін тапсырады. Монополистер өздері орналасқан жерінде әлеуметтік жобаларға қатысуы міндетті екендігі айтылып, өңір дамуына өз үлестерін қосуға тартылады. Ал, ЖПИК-ке қатысты мәселер аясында қаламызда 262 көпқабатты үй болса, 30 ЖПИК пен 108 кондоминиум бар. Бұлардың қызметіне жылыту маусымында жылудың циркуляциясы сақталмайтындығы, жертөлелердің сын көтермейтіндігі жайында тұрғындар тарапынан арыз-шағымдар көптеп түсіп, бұл бағытта тиісті шаралар қолға алынған.
Бизнесті заңсыз әкімшілік қысымнан және қылмыстық қудалау қаупін қорғауды арттыру бойынша қала бойынша шағын және орта бизнестің даму қарқыны оң көрсеткіш беріп отыр. Бүгінгі күні 8412 кәсіпкер тіркелген, оның 6986 жеке кәсіпкер, 1402 заңды тұлға, 20 ауылшаруашылықпен айналысушы болса, жұмыс істеп тұрған шағын және орта кәсіпкерлік субъектілері 8232-ні құрайды. Сондай-ақ Жаңаөзен қаласында бизнес өкілдері үшін салық амнистиясы, яғни борышкер салықтың негізгі қаржысын төлесе, айыппұл мен өсімпұл жою бойынша жұмыстар жүргізіледі. Бұл тұрғыда, кірістер басқармасының мәліметінше 300-ге жуық бизнес өкілдері ұсынылатын болады.
Тұрмыс сапасын арттыруға бағытталған Жолдаудың екінші бөлігінде денсаулық сақтау, білім беру сапасын арттыру, тұрғын-үйдің қолжетімділігі және қоғамдық тәртіптің орнатылуына байланысты. Педагог қауымның рөлін арттыруда келер жылы педагог статусы белгіленетін заң қабылданады. Білім ордаларында білімді ұрпақ, білікті маман даярлау жұмыстарына талаптар күшейтіледі. Оқу бітірген студенттердің ұзақ мерзімді жұмыспен қамтылуы да міндеттелмек. Арнаулы оқу орындарының мәліметіне сүйенсек қаламызда 2016-2017 оқу жылында колледжді аяқтаған 1029 түлектің 742-сі тұрақты жұмысқа орналасса, ал 2017-2018 оқу жылындағы 1419 түлектің 1093-і (75 %) жұмысқа орналасқан. Сонда да жұмысысыздық бөлімінде жұмыссыз жастардың саны аз еместігі байқалады.
ТАҒЫ ОҚЫҢЫЗ: Құбырдан неге су емес «мұнай» ағады?Халықтың денсаулығын жақсарту, салауатты өмір салтын сақтау мақсатында бұқаралық спортты дамыту міндетті жұмысқа айналған. Қаламызда 103 спорттық нысандар, статистикалық деректерге сәйкес 34 мыңнан астам адам спортпен тұрақты түрде шұғылданады. Қаламыздың 50 жылдық мерейтойына орай 10 воркаут алаңша қойылады. Бұл тұрғындардың спортпен шұғылдануға жағдай туғызады дейді қала басшысы.
Тұрғындарды сапалы қолжетімді баспанамен қамту мәселесі де Елбасы Жолдауында орын тапты. Бізде 262 көпқабатты үй болса, оның 23-і тозығы жеткен үйлер. «Шаңырақ» шағынауданындағы №43,59 апаттық жағдайдағы үй тұрғындарына бюджет қаражатынан пәтерлер сатып алынып, көшірілді. Жеке инвестор есебінен «Арай» шағынауданынан 1376 пәтерлі 6 қабатты 23 үй салынып жатыр. Кешеннің 24 пайызы, 310 пәтер тозығы жеткен үйлердің тұрғындарына беріледі деп жоспарланған.
- Айтылған жұмыстардың барлығы Елбасы саясаты бойынша, нақты міндеттемелік тапсырмалары, бағдарламалары аясында жасап жатырмыз. Жолдаудың маңыздылығы, мемлекеттік бағдарламалардың тиіділігі ел дамытуға пайдасын береді. Ал, оны ұйымдастыру, жүзеге асыру біздің кәсіптік деңгейімізге, атқарып отырған қызметіміздің адалдығына байланысты, - деді Ә.Дауылбаев.
Қала әкімі Жолдауда туындаған мәселелер, атап айтар болсақ, кәсіпкерлік жобаларды өткізу, монополистік мекемелерді анықтау, ЖПИК, кондоминиум жұмысына талдау жасау, салық амнистияға түсетін шағын және орта кәсіпкерлік субъектілеріне тиісті жұмыстар жүргізу, салық төлеушілерді нақтылау, жастарды жұмыспен қамту, барлық тұрғындардың электрондық денсаулық паспорттарын жасақтауды өзінің үш орынбасары мен тиісті мемлекеттік мекемелерге, коммуналдық кәсіпорындарға тапсырды. Аталған мәселелер бойынша толық танысып, шешімді жолдарын қарастыру міндеттелді.
Сонымен қатар, мәжілісте арагер мұнайшы Майлыбай Өтебайұлы, қалалық мәслихат депутаты Тимур Мұсаев, қалалық мемлекеттік қызметке мониторинг жасау бөлімінің басшысы Есболат Имашев баяндама жасады. Қатысушылар тарапынан сұрақтар жазбаша жолданып, нақты жауаптары берілді.
Жазира АҚБЕРГЕНОВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
