Италия инвесторлары – Маңғыстауда

Елбасы Нұрсұлтан Назарбаев биылғы жылғы 5 қазандағы «Қазақстандықтардың әл-ауқатының өсуі: табыс пен тұрмыс сапасын арттыру» атты халыққа Жолдауында кәсіпкерлер жағдайы мен елде бизнес жүргізуге қолайлы жағдай жасауға ерекше көңіл бөлді. Осы орайда Маңғыстау облыстық «Атамекен» ұлттық кәсіпкерлер палатасы Италиядан келген құрметті меймандарды қарсы алып, өзара ынтымақтастық орнатып, біздің өлкеде бірлесе кәсіпкерлікті дамытуға арналған жұмыстарды жүргізуге уағдаласты.

Мемлекет басшысы биылғы Жолдауында «Бизнестің жол картасы – 2020» бағдарламасын 2025 жылға дейін ұзартуға тапсырма берді. «Өңірлерге жұмыс сапарым барысында мұның тиімділігіне көз жеткіздім», – деген Нұрсұлтан Әбішұлы, осы бағдарламаны жүзеге асыру үшін жыл са­йын қосымша кемінде 30 миллиард теңге бөлу керектігін де еске салды. Бұл бағдарламаның кәсіпкерлер үшін теңдессіз екенін ұзақ жылдар бойы жеке кәсіпкерлікпен айналысып жүрген тұлғалардың өзі мойындап отыр.

Сондай-­ақ биылғы Жолдауда экономикамызды отандық өнімдермен қамтамасыз ету­дің маңыздылығына Елбасы кеңінен тоқталды. «Біздің сауда саясатымызда селқостық бол­мауы тиіс. Сонымен бірге халық тұтынатын тауарлардың ауқымды номенклатурасын иге­ріп, «қарапайым заттар экономикасын» дамыту үшін кәсіпорындарымызға көмектесу қажет», - деген еді Нұрсұлтан Назарбаев.

Италия инвесторлары Маңғыстауда бизнесті дамытуға ниетті екендіктерін жеткізіп, арнайы делегация Ақтауға табан тіреп, өлке­нің әлеуетімен танысты. Италия іскерлік тобын Лониго қаласының мэрі Лука Рестелло бастап келді. Онымен бірге Қазақстандағы Италия елшісінің орынбасары Марко Эзпосто, мэр кеңесшісі Диего Марказан және «Лейзин» ха­лықаралық мектебінің бас директоры Георгий Махвиладзе де бар. Тараптар туризм, құрылыс, ауыл шаруашылығы, кен өндіру салаларын бір- лесіп дамытуға қызығушылық танытып отыр.

- Мемлекет басшысы Қазақстан халқына арнаған Жолдауында еліміздің дамуына жа­ңа міндеттер жүктеді. Елімізге келетін им­портты отандық өніммен алмастыру бо­йынша жұмысты күшейту және тауарды экспорттаушыларға қолдау көрсету қажеттілігін атап өтті. Облыста сыртқы саудаға шығатын полиэтилен құбырлары, цемент және аммоний нитратының экспорты үлкен әлеуетке ие. Бүгін­гі таңда Маңғыстау облысының сыртқы сауда айналымы 3,5 млрд. АҚШ долларын құрады, соның ішінде экспорт – 3,1 млрд.$, импорт – 338,1 млн.$. Қазақстанмен сауда әріптестігін нығайтқан алғашқы үштікте Италия тұр. Бұл елмен Маңғыстаудың сауда айналымы 482,2 млн. АҚШ долларын құрады, яғни экспорт – 447,1 млн. АҚШ доллары, импорт – 35,2 млн. АҚШ доллары. Сыртқы сауда айналымының негізгі бөлігін мұнай мен мұнай өнімдерінің экспорты құрайды (265,7 млн. АҚШ доллары), табиғи асфальтқа негізделген битум қоспалары 25 мың АҚШ долларына жетіп отыр. Бұдан басқа, экспорттың үлес салмағын 54 мың АҚШ долларын құрайтын қара металдардың жіксіз құбырлары, түтікшелері мен құймалары толықтырады. Аймақтағы импорт көлемі – 35,2 млн. $, соның ішінде құбырлар, кақпақ­тар мен құбырларға арналған жабдықтар – 10,1 млн.$, сұрыптау, скрининг және тас бөлу үшін жабдықтар 10,1 млн. АҚШ долларына жетті, – деді шара модераторы, Маңғыстау об­лыстық кәсіпкерлер палатасының директоры Нұрбек Қарасаев.

Облысымыздың экономикалық мүмкін­дігімен танысқан меймандар Лониго қаласы туралы бейнеролик ұсынды. Екі жақты ын­тымақтастық орнатып, кәсіптің көзін ашу мақсатында өңірімізге келген Лониго қала­сының мэрі Лука Рестелло кәсіпкерлерге ал­ғысын білдіріп, сөз сөйледі.

- Бұл келісім қазақстандық-­италиялық кә­сіпкерлер үшін зор мүмкіндік болмақ. Лони­го қаласы Италияның солтүстігінде орналас­қан. Ал еліміздің солтүстігі индустрияланған мекен деп толықтай айта аламыз. Химия өнеркәсібінен бастап, машина өнеркәсібіне, ауыр өнеркәсіпке дейін жалғасады. Ауыл шаруашылығында қолданылатын жаңа техно­логияларға байланысты қарым-­қатынас орна­тып, бірлесе жұмыс істеуге мүмкіндік бар. Туризм саласында білім беруді қолға алуға болады. Сіздердің қалаларыңызбен бірлесе жұмыс істеу туралы осыдан 3 жыл бұрын ойлана бастадық. Сол уақыттан бері байланыс орнатып, бүгінгідей бірлесіп жұмыс істейтін жағдайға жеттік. Ақтау мен Лониго қалалары арасында ынтымақтастықты дамыту жөніндегі меморандумға қол қойылды. Соның негізінде өңірде инвестициялық жобаларды дамытуды көздейміз. Мәдениет, білім, спорт салаларына да қосарымыз бар. Ауыл шаруашылығына арналған жобаларымыз да қызықтыруы әбден мүмкін, – деді Лука Рестелло.

Ал аймақтық кәсіпкерлер палатасы жа­нындағы Маңғыстау облысы іскер әйелдер кеңесінің төрайымы Сәуле Салихова 10 жылдан астам уақыт итальяндық кәсіпкерлермен жұмыс істеп келеді.

ТАҒЫ ОҚЫҢЫЗ: Табиғат пайдаланушыға Үстірт ақбөкендерін сақтауға үлес қосу ұсынылды

– 2007 жылдан бері интерьер, жиһаз жасау­шы 70-­тен астам итальяндық кәсіпкерлермен жұмыс істеп келемін. Миланда өтетін барлық көрмелерге қатысамын. Ондағы зауыттардың инновациялық құралдармен жабдықталғанына көзім жетті. Сондықтан үй жиһаздарын Ита­лиядағы сенімді серіктестерім арқылы аламын. Сол себепті де іскерлік әріптестікті одан әрі дамытуға дайынмын. Егер итальяндық жиһаз өндіруші компанияның базасын біздің облы­сымызда ашсақ, нұр үстіне нұр болар еді, – деді Сәуле Салихова.

Италиядан келген меймандар кез келген ұсынысты егжей-­тегжей қа­растырып көретіндерін жеткізді. Ал облыста қонақ үйлер кешенін дамытушы кәсіпкер Тимур Абдыкаримовтің  айтуынша, Маңғыстаудың туристік әлеуеті жоғары. Қазірдің өзінде қонақ үйлерге тәулігіне 500 адам келеді. Алда үлкен кешен құрылысы аяқталғаннан соң медициналық туризм ілгерілеп, емдеу-­сауықтыру шараларын жүргі­зіп, тәулігіне 800 адам қабылдау жоспарланған. Осы салада италяндық әріптестерімен тәжі­рибе алмасуға дайын.

Бизнесті бірлесе дамытуды ұсынған кә­сіпкерлер келер жылы сәуірде Италияда өтетін экономикалық форумға шақырту алды. Маң­ғыстауда теориялық тұрғыда айтылып, қағаз жүзінде жасалған келісімдер сол кезде нақты жүзеге асады.

Тойгүл НҰРЖАНҚЫЗЫ