Отбасы - кіші отаның

«Шаңырақ» қоғамдық қоры биыл Маңғыстау облыстық ішкі саясат басқармасының мемлекеттік әлеуметтік тапсырысына сәйкес гендерлік теңдік стратегиясының негізгі бағыттарын түсіндіру және отбасы құндылықтарын насихаттау бойынша ақпараттық-ағартушылық жұмыстарын жүргізді.

Атап айтқанда, келіндер арасында облыс көлемінде «Үлгілі келін» байқауы ұйымдастырылды.  Бай­қауға әр ауданнан орта есеппен 5­-6 келін­нен, кей аудандарда 8-­10 келіннен қатысып, келіннің отбасындағы алатын орнының ерек­ше екендігіне мән берілді. Барлық өткізілген «Үлгілі келін» байқауы әлеуметтік желілер­де, баспасөз беттерінде жарияланып, көп­шілік тарапынан зор қолдау тапты.

Сондай­-ақ «Қазақстанды цифрланды­ру – әйелдер үшін жаңа мүмкіндіктер» та­қырыбында дөңгелек үстелдер Мұнайлы, Түпқараған, Қарақия аудандары мен Ақ­тау, Жаңаөзен қалаларында өткізіліп, үй шаруасындағы, бала күтіміндегі аналарға толық мағлұматтар мен кеңестер берілді. «Цифрлы Қазақстан» бағдарламасын жүзеге асырудағы 4 бағыт жайлы айтылды.

Бірінші бағыт – ауыл аймақты кең жолақты интернетпен қамтамасыз ету. Аталған бағыт бойынша кең көлемде пікірлесу ұйымдас­тырылды. IT мамандарын даярлаудың өзек­тілігі сөз болды. «EGov» жүйесі, ЭЦҚ кілтін алу туралы түсінік берілді. Ал облыстық «Мерейлі отбасы» байқауында өсіп өнген, балаларына тәлімді тәрбие берген, орта­сына сыйлы жанұялар қатысып, өмірлік тәжірибелерімен бөлісті. Байқауда жеңімпаз атанған отбасы республикалық кезеңге қа­тысуға жолдама алды.

Жылда елімізде қыркүйек айының ор­тасында Отбасы күні аталып өтеді. Қоғам осы күнге арнап «Отбасы – бұл кіші Отан» тақырыбында әлеуметтік бейнеролик әзір­леп, жұртшылық назарына ұсындық.

«Алтын алқа», «Күміс алқа» иегерлері, ардақты аналарымыздың қатысуымен өткен «Отбасы және заманауи қоғамдағы бала тәрбиесі» тақырыбындағы дөңгелек үстелде жас аналарға, жаңа шаңырақ көтерген отба­сыларға, жастарға ақыл-­кеңестер берілді. Өз кезегінде олар өздерін толғандырып жүрген мәселелер бойынша сұрақтар қойып, тұ­шымды жауаптар алды.

Сонымен қатар әкімдіктердің жауапты қызметкерлерін, гендерлік саясат және отба­сы істері жөніндегі комиссия хатшыларын ұйымдастырушылық жұмыстарға тарта отырып, халық арасында отбасылық құн­дылықтарды нығайтуды насихаттау бойын­ша дөңгелек үстелдер мен кездесулер де ұйымдастырылды. Аталған тақырыптағы дөңгелек үстелдер мен кездесулер Мұнай­лы, Маңғыстау, Түпқараған аудандары мен Ақтау қаласында №21 орта мектеп пен №13 гимназияда өткізілді. Кездесуде от­басы құндылықтары, ата­-аналар мен білім ордасының ынтымақтастығының бала тәр­биесінде алатын орны жайлы толық пікір алмасу өткізілді.

Мектепті ұлағат ұясына айналдыру үшін ең басты ұлттық тәрбие мектебін құру қажеттігі назарға берілді. Іс­-шараға қаты­сушылар ұрпақ тәрбиесіндегі әке, ана жа­уапкершілігін көтеру, аналар қозғалысын жандандыру, аналар кеңесін құру жайлы өз ой­-пікірлерін ортаға салды.

Жоба қорытындысында «Аналар – асыл жандар» атты гендерлік балы өткізілді. Бір айта кетерлігі бал жылдағыдан өзгеше түрде ұйымдастырылды, яғни көп балалы отбасы­лар, мүмкіндігі шектеулі балаларды бағып­ қағып отырған ата­-аналар шақырылды. Бал соңында мүгедек балалар қолынан шыққан бұйымдар жәрмеңкесі ұйымдастырылып, қа­тысушылар асқан қызығушылықпен оларды сатып алды. Өнерлі балаларға ізгі тілектерін айтты.

Еркеш НӘРЕМБАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.