Автошеру Жаңаөзенде

Қазан айының 5-6 күндері Маңғыстау облысындағы «Ауғанстан соғысының ардагерлері мен мүгедектерінің одағы» қоғамдық бірлестігінің ұйымдастыруымен Ауғанстан Демократиялық Республикасынан Кеңес әскерінің шығарылғанына 30 жыл толуына орай облыс көлемінде автошеру өтті. Іс-шараның негізгі мақсаты Ауғанстан жерінде соғыс операцияларына қатысқан жауынгер-интернационалистердің ерлік істерін дәріптеп, үлгі ету бойынша еліміздің болашағы жастарды және Отан алдындағы борышын өтеуші жас сарбаздарды отансүйгіштікке, патриотизмге тәрбиелеу. Белгіленген маршрут бойынша аталған автошеру Ақтау қаласынан бастау алып, Мұнайлы, Қарақия аудандарынан Жаңаөзен қаласына да келіп жетті. Қаламыздағы ардагерлер саябағында қалалық әкімшілік қызметкерлері, ардагерлер, мектеп оқушылары, сарбаздар және БАҚ өкілдерімен бірге салтанатты түрде қарсы алу рәсімі ұйымдастырылды. - Кезінде Ауғанстан жерінде соғысқа қатысқан азаматтарымыз азаматтық борышын өтеп жүріп, түрлі қиын жағдайларды басынан өткерді. Міне, сол аға ұрпақтың, сіздердің ерлік істеріңіз жастарға үлгі болып қала бермек. Жастар, сіздерге айтарым, қай нәрсенің де тек жақсы жағын үйреніп, егемен Қазақстанымызды қорғайтын батыл да батыр, еліміздің патриоты болып, халыққа адал қызмет ете беріңіздер, - деп қала әкімінің орынбасары Исахан Сағынбаев  жиналған жастарға игі тілегін жеткізді. Сонымен қатар, аталмыш автошерудің облысымызда өтуіне мұрындық болған «Ауғанстан соғысының ардагерлері мен мүгедектерінің одағы» қоғамдық бірлестігінің төрағасы Байрам Мамедов: - Біз көрген соғысты сендер көрмеңдер! Маңғыстаудан 8 азамат сол соғыс кезінде, Ауғанстан жерінде құрбан болған. Соғыс болмасын, елімізде ешқандай қиындық көрмесін дейміз, бірақ ер жігіттеріміз қандай қару-жарақ бар, қалай пайдаланады, автоматты қалай бұзып-жинайды, міне, осыларды білуі қажет. Аман болыңыздар, Қазақстанымыз гүлдене берсін, - деп Исахан Қайнарбайұлына Бақытбек Смағұлдың қазақтың «қара мойоры» Борис Керімбаев жөнінде жазылған кітабын сыйға тарту етті. Одан кейін, Қызылсай ауылы маңында Әбдіразақ қорымындағы Ахмет Қолдаспаевтың басына барып, Құран бағышталды. Автошерудің ендігі бағыты Маңғыстау ауданындағы Шетпе селосында және Түпқараған ауданындағы Форт-Шевченко қаласының Баутино ауылдарында жалғасын таппақ. Маршрут бойынша елді мекендердің белгіленген алаңдарында, жергілікті әкімшілікпен бірлесе отырып, Ауған жерінде әскери борышын өтеу кезінде ерлікпен қайтыс болған жерлес жауынгер-интернационалистерді еске алу рәсімі өтеді.

Айтолқын БЕРІККЫЗЫ