Құрық ауылының жастары екі отбасыға баспана сыйлады

Қарақия ауданындағы Құрық ауылының жастары рамазан айында екі бірдей мұқтаж отбасыға қуаныш сыйлап, баспана кілтін табыс етті, деп хабарлайды mangystaumedia.kz аудан әкімдігінің баспасөз қызметіне сілтеме жасап.

Баспаналы болғандардың бірі — Аппақ ауылында тұратын Теңел Шәбілұлының отбасы бар. Осыған дейін қос зейнеткер бала-шағасы, немере-жиендерімен бірге бір үйде 19 адам тұрған. Отбасында мүгедек балалары да бар. Жанұяның осы жағдайын ескерген ауыл жастары оларға Құрық ауылының басынан 3 бөлмелі пәтер сыйлады.

Екінші үйдің иесі - Құрық ауылының тұрғыны, 3 балалы жалғызбасты ана Гульзия Батырбаева. Осы күнге дейін пәтер жалдап жүрген. Тосынсыйды естігенде қуаныштан көз жасына ерік берді. Айта кетейік, ауыл жастары бұған дейін де 2 мұқтаж отбасыға пәтер табыстаған болатын.

- Жетімін жылатпаған, жесіріне қамқор болған ата-бабамыздың арда салтынан бүгінгі жастар алыстап кетпеген екен. Жасаған жақсылықтары өздеріне еселеп қайтсын. Отыз күн бойы оразада тілеген тілектеріңіз қабыл болсын, - деді ауыл тұрғыны Несібелі Түлкібайқызы.

Сондай-ақ ауыл жастары Құрық ауылының тұрғыны Мурадым Увашовқа қажылыққа сертификат табыстады. Салтанатты шараның соңы гір тасын көтеру, қол күресі сынды спорттық сайыстарға ұласып, ауызашар дастарханы да жайылды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.