©
Қазіргі таңда жастарымыздың әскер қатарына барулары сиреп, Отан алдындағы борыштарын өтеуге деген немқұрайлылығы басым. Бұрынғыдай емес, еліміздің экономикалық хал-ахуалы жақсарып, бәрі көз алдыңда өтіп жатса да, Отан алдындағы борышты өтеу мерзімін қысқартып, елге жағдай жасалып берілсе де жастарымыздың осы бағытқа деген ықыласы төмен.
Оның үстіне қазір көптеген оқу орындарының жанына әскери кафедра ашылып, ер балалар жағы әрі оқуын бітіріп, әрі әскери борышын өтеп шығып жатыр. Дегенмен әскер қатарында сап түзеп, ер азаматтық міндет пен елі мен жеріне қорған болудың не екенін ұғынып, ел басына күн туған заманда әрдайым қолына қару алуға дайын тұратын, қиындық пен қамқорлық, ерлік пен бірлікті шын жан-тәнімен ұғыну үшін ант берген сәт те ерекше. Азаматтардың есінде мәңгі есте қалар мәртебелі шағы. Әскерге шақырылуға жасы жеткен, Қазақстан азаматтарын тіркеу үшін аудандық қорғаныс істері жөніндегі бөлім жыл сайын мектеп оқушыларымен кездесу өткізіп, оларға әскери міндет туралы түсінік беріп келеді. Биылғы жылға шақыру учаскесіне әскери есепке тіркеу жұмыстары тағы да басталды.
«Әскери міндеттілер мен әскерге шақырылушыларды әскери есепке алу қағидаларын бекіту туралы» Қазақстан Республикасы Қорғаныс министрлігінің 2017 жылғы 24 қаңтардағы №28 бұйрығына сәйкес Маңғыстау аудандық қорғаныс істері жөніндегі бөлімде азаматтарды әскерге шақыру учаскелеріне тіркеу жұмыстары басталысымен әскерге шақыру учаскелеріне тіркелген азаматтарға әскери есепке тіркеу куәліктерін салтанатты түрде табыстау Б.Жұмалиев атындағы орта мектепте өткізілді. Шараның басты мақсаты жастарды отансүйгіштікке тәрбиелеу, өз елінің патриоты бола жүріп, елін, туған жерін қорғау, адал қызмет етуге баулу.
Жиынға аудан әкімінің орынбасары Е.Махмутов, аудандық білім бөлімі басшысының орынбасары Е.Мәжитов, аудандық қорғаныс істері жөніндегі бөлімінің бастығы, капитан Н.Танбаев, жастар орталығының басшысы А.Қонарбаев және Б.Жұмалиев атындағы орта мектептің жоғарғы сынып оқушылары қатысты.
Шарада әскерге шақыру комиссиясының төрағасы, аудан әкімінің орынбасары Е.Махмутов: - Қазіргі таңда Маңғыстау ауданының 20 азаматы еліміздің әр түкпірінде офицерлік қызметте жүр. Бәрі де Отан үшін адал еңбек етуде. Жастардың парызы – ең алдымен Отанды қорғау және оған қызмет ету, - деп, Отанды қорғау ер азаматтардың қасиетті парызы екенін айта келе, бүгінгі шараның мақсаты Отан алдындағы азаматтық борышты өтеуге шақыру екенін түсіндіріп өтті. Аудандық қорғаныс істері жөніндегі бөлімінің бастығы, капитан Н.Танбаев Елбасымыздың «Болашаққа бағдар: рухани жаңғыру» мақаласында айтылғандай «Мақсатқа жету үшін біздің санамыз ісімізден озып жүруі, яғни одан бұрын жаңғырып отыруы тиіс» деп оқушыларды Қазақстан Республикасының Қорғаныс министрлігінің жоғарғы әскери оқу орындарымен, оқуға түсу шарттарымен қысқаша таныстырып өтті. Әскерге бару әр азаматтың Отан алдындағы борышы екенін айта келе, азаматтарды әскер сапынан көрінуге шақырды.
Маңғыстау аудандық жастар орталығының басшысы А.Қонарбаев, Қазақстан Республикасының Қарушы Күштері ардагері, запастағы майор Б.Қуанбаев оқушыларды Қазақстан Республикасының Қорғаныс министрлігінің жоғарғы әскери оқу орындарына шақырып, әскери оқу орындар жөнінде қысқаша ақпарат берді.
Жиын соңында Е.Махмутов пен Н.Танбаев әскери есепке тіркелген оқушыларға әскери есепке тіркеу куәліктерін салтанатты түрде табыстады.
Д. НҰРЖАН
Тағы оқыңыз: Жаңаөзенде телефон терроршылары тыйылмай тұр
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
