Маңғыстау ауданына қарасты Тұщықұдық ауылындағы мәдениет үйінде "Рухани жаңғыру" бағдарламасы аясында "Туған жерге тағзым" атты ауыл мектепбі түлектерінің басқосуы өтті. Мектепте бірге оқып, 70 жасқа жетсе де достығына сызат түспеген, сыйластығымен көпке үлгі болған ел азаматтары өздерінің туған ауылында кездесті.
Келелі жиынға үш мәрте Қазақ ССР Жоғарғы Советі мен ҚР Мәжіліс депутаты болған Қайролла Ережепов, ұзақ жылдар басшылық қызмет атқарған, Маңғыстау ауданының құрметті азаматы Сақып Керелбаев, Қазақстан Республикасының «Мәдениет қызметкері» әнші Әбіл Жұмағалиев, қарапайым еңбек адамы Қосан Жақаев және ардагер ұстаз Ордалы Қосай шақырылды. Кездесу кешіне Маңғыстау облыстық мәслихат депутаттары Сәуле Жақаева, Рәббім Борашев, Серікбай Тұрымов, Ахмет Салманов, Атқосшы Кетебаев, Мереке Дүйсенбаев, Сағыныш Төрәлиев қатысты.
Жиналғандар, алдымен, мектеп мұражайымен танысып, мектеп оқушыларының ұлттық бұйымдардан дайындаған көрмесін тамашалады. Бұдан соң ауыл маңындағы құм тоқтату мақсатында өсірілген сексеуіл орманын аралап, қарақұдықтың басына барып су ішіп балалық шақтарын бір еске түсірді. Қасиетті Айдар Ишан ата құдығынан дәм татып, Айдар Ишан мен Сәттіғұл Жанғабыловтың рухына Құран бағыштады.
Осы күні Тұщықұдық мәдениет үйінде жас ұрпақпен, ауыл тұрғындарымен бас қосты. Аудан әкімі Жармағанбет Айтуаров сыйлы қонақтарға шапан жапты. Кеш қонақтарына Жаңаөзен сүт зауытының директоры, Маңғыстау облыстық іскер әйелдер қауымдастығының төрайымы, облыстық мәслихат депутаты Сәуле Жақаева сый-сияпаттар табыстады. Кездесу кешінің өтуіне қаржылай көмек көрсеткен мектептің 1977 жылғы түлегі, «Мерос» ЖШС директоры, облыстық мәслихат депутаты Мереке Дүйсенбаев интерактивті тақтаны сыйға тартты. Осы мектептің 1984 жылғы түлегі, Маңғыстау облыстық білім басқармасының орынбасары Айжақсы Тұржанова он дана шахмат столын сыйға тартты.
Мектеп ұжымына Маңғыстау облыстық білім басқармасы басшысы Зейнеп Тастемірованың атынан Алғыс хат табысталса, бірнеше мұғалім «Өрлеу» біліктілікті арттыру ұлттық орталығы» АҚ Маңғыстау филиалы басшысының Алғыс хатымен марапатталды.
Кеш қонақтарының ұстаздары Асқар Жұмақалиев, сынып жетекшісі Жамбыл Нәубетов, сол жылдардағы мектеп директоры болып қызмет атқарған Аралбай Қуанбаев естеліктер айтса, оларға шәкірттері шапан жауып, құрмет көрсетті. Кеш мектеп оқушыларының ән-жырымен аяқталды.
Тұщықұдық ауылы - жақсылар мен жайсаңдардың мекені болып, қойнауы құтқа толған ауыл. Тоқсан жылдық тарихы бар, ақын Сәттіғұл Жаңғабыловтың атындағы орта мектеп көптеген танымал тұлғалар мен өнер майталмандарын ұшырған ұлағатты ұя. Жас ұрпақ осы топырақтан қанаттанып ұшқан ата ұрпақпен мақтанады, олармен әрбір жүздесу - ұрпақ үшін зор өнеге.
Суреттерді түсірген Серік МАЙЕМЕРОВ
[gallery td_select_gallery_slide="slide" ids="43176,43175,43174,43173,43171,43172"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
