Жуырда Онды селолық мәдениет үйінде мекемелер арасындағы байланысты нығайта отырып, қызметкерлердің таланттарын ашып, жақсы көңіл күй сыйлау мақсатында сайыс өтті.
Алдымен ауыл әкімі Б. Балапан бірлігі жарасқан ауылдың ынтымақтастығын арттыратын осындай шараның көптеп өткізіліп тұруын айтып, қатысушыларға сәттілік тіледі.
«Тойдың болғанынан боладысы қызық» демекші жарыс болады дегеннен үлкен дайындықта жүрген мекемелер бұл күнді тағатсыздана күтті. Кімнің бабы шауып, бағы озып кетеді екен деп қызығушылық танытқан ауыл тұрғындары да мәдениет үйіне ағылып жатты.
Қатысушылардың білімі, өнері сынға түсіп, спорт саласынан тапсырмалар да болды. Шығармашылық шеберліктерін шыңдап, өнерлерін қомдап келген олар көрерменнің ыстық ықыласына бөленді. Нәтижесінде Онды амбулаториясының қызметкерлері I орынға, «Құлыншақ» балабақшасы II орынға, Онды орта мектебінен келген «Бәйшешек» тобы III орынға тұрақтады.
Рухани азық сыйлаған сайыс мәнді де, мағыналы, әдемі де әсерлі өтіп, көрермендер қауымы көтеріңкі көңіл күймен тарасты.
Ә.ЖҰМАҒАЛИЕВА,
Онды селолық мәдениет үйінің әдіскері
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
