Ақтау тұрғынын дүкендегі Z әрпін айтқаны үшін жазалады

Ақтау қаласының әкімшілік құқық бұзушылық істер жөніндегі мамандандырылған соты азамат Т.-ға қатысты бұқаралық ақпарат құралдарын пайдалана отырып, басқа адамның ар-намысы мен қадір-қасиетіне нұқсан келтіретін және беделіне нұқсан келтіретін көрінеу жалған мәліметтерді тарату фактісі бойынша істі қарады, деп хабарлайды mangystaumedia.kz облыстық соттың баспасөз қызметіне сілтеме жасап.

Сот 28 ақпан күні сағат 21.00-де азамат Т.-ның Ақтау қаласында орналасқан дүкеннің қасында болып, Facebook әлеуметтік желісіне осы дүкеннің өз атауында «Z» әрпін көрсетіп, Украинаға қарсы Ресей агрессиясын насихаттайтыны туралы видео таратқаны анықталды.
Бұл факті әкімшілік құқық бұзушылық туралы хаттамамен, полиция қызметкерінің хаттамасымен, жәбірленушінің арызымен расталады.

«ӘҚБтК-нің 73-3-бабының 2-бөлігінің санкциясы жеке тұлғаға 180 АЕК мөлшерінде айыппұл салуға немесе 20 тәулікке әкімшілік қамаққа алуға, лауазымды тұлғаға 160 АЕК мөлшерінде айыппұл салуға әкеп соғады.
Іс бойынша жеңілдететін мән-жайлар анықталған жоқ», - делінген сот хабарламасында.

Сот қаулысымен Т., ӘҚБтК-нің 73-3-бабының 2-бөлігімен кінәлі деп танылып, оған 20 тәулікке әкімшілік қамаққа алу түріндегі әкімшілік жаза тағайындалды.

Қаулы заңды күшіне енген жоқ.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.