Жыл сайын ерекше екпінмен тойланатын Байланыс және ақпарат құралдары қызметкерлерінің мерекесі толассыз құттықтау лебіздер мен игі шараларға, құрмет-қошеметке толы болады. Мерекеде еңбек жолын журналистика саласымен етене байланыстарған БАҚ өкілдері ыстық ықыласқа, шадыман шаттыққа бөленеді. Жаздың жайма шуақ күнінде тойланатын мейрамда Ақтау қаласының әкімі Ғалымжан Ниязов жергілікті және республикалық телеарна мен газетте және сайтта жасайтын журналистер мен операторларды, фототілшілерді құттықтап, сый-құрмет көрсетті.
– Құрметті қонақтар! Байланыс және ақпарат қызметкерлерінің мерекесі құтты болсын! Облыс орталығында жасалып жатқан жұмыстардан, игілікті істерден халықты хабардар етіп, жаңалықтың жаршысы болып жүрсіздер. Сонымен қатар халықтың мұң-мұқтажын, қаладағы өзекті мәселелерді де бізге жеткізіп, құлағдар етіп келесіздер. Қаламыздың әлеуметтік-экономикалық дамуына қосқан үлестеріңіз үшін сіздерге алғысымды білдіремін. Сіздермен тығыз қарым-қатынас орнату арқылы халықпен байланыста жүйелі жұмыс жасағымыз келеді. Алдағы уақытта бірге, ынтымақтастықта еңбек етуге шақырамын. Жарасымды жанұя бақытына бөленіп, шығармашылықта жаңа биіктерді бағындыратын мықты денсаулық, мол табыс тілеймін, – деді шаһар басшысы Ғалымжан Мұқырұлы.
Мерейлі сәтте қала әкімі БАҚ өкілдерімен қатар mangystaumedia.kz сайтының фототілшісі Талант Құсайынды, облыстық қоғамдық-саяси «Маңғыстау» газетінің тілшісі Фарида Мұңалқызын, «Огни Мангистау» газетінің тілшісі Надежда Шульганы марапаттады. БАҚ өкілдеріне алғыс хат, гүл шоқтары және қаржылай сыйлық табысталды.
ТАҒЫ ОҚЫҢЫЗ: Отпан тау – елдің асыл мұрасыҚала әкімімен дөңгелек үстел басында бас босқан әріптестер риясыз құрмет пен ыстық ықыласқа алғысын білдіріп, ақжарма лебізін білдірді.
– Біздің еңбегімізді елеп, мерекеде жанымызды жадыратып, ықылас білдіргеніңізге алғыс айтамыз. Қаланың 55 жылдығына орай жасалып жатқан шаруалардың көптігін күнделікті жұмыс барысында көріп жүрміз. Жаңа құраммен жасақталған қала әкімінің баспасөз қызметі де БАҚ өкілдерімен байланыс орнатты. Халық игілігі жолындағы жұмыстарыңызға сәттілік тілеймін. Барша әріптестерді мерекемен құттықтап, дендеріңізге саулық, отбасыларыңызға амандық, бақ-береке тілеймін! – деді mangystaumedia.kz сайтының фототілшісі Талант Құсайын.
Фарида МҰҢАЛҚЫЗЫ Суреттерді түсірген Талант ҚҰСАЙЫН
[gallery td_select_gallery_slide="slide" ids="56898,56899,56902,56901,56900,56903,56904"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
