Күйші Серіктің еңбек белестері

Дарқан даланың көкжиегіндегі көрмедей көз тартатын сұлу жер, Қаратаудың етегіндегі Шайыр ауылы – шайырлардың бесігі, мықтылардың мекені. Мұнда мәдениет пен спорттың, шығармашылықтың нәрі, дүлдүлдердің үні қалған. Асқақ рухтың қайнары да, айбары да осында. Осындай қасиетті топырақта туған ұлдар қалай текті болмасын? Шайыр – Қашаған Күржіманұлы, Медет Жылкелді, Аралбай жыраулардың, қазақ боксының негізін қалаған Шоқыр Бөлтекұлының, бертінде желаяқ Әмин Тұяқов, суретші Бірғали Байекеев, ақын, сазгер Қыдырбай Тұрмағанбетұлы, журналист, ақын Талғат Атшыбаев, ақын, сынды жақсылар мен жайсаңдардың өскен ордасы.

Осы топырақта 1958 жылдың мау­сымында дүниеге келген ке­йіпкеріміз Серік Еңсегенов: «Өткен өмір – ескі жылдардың естелігіне толы. Еңбек жолымда қоғамның әртүрлі салаларында еңбек етіп, қал­-қадірімше, шама­ шарқымша ел дамуына үлес қосып келемін, – деп бастады әңгімесін. Бүгінде 60 жастың асқарын бағындырған ел азаматының өмірбаяны өнегелі әрі өрнекті.

Мақаламызға арқау болып отырған кейіпкері­міз – «Правда» кеңшарында (қазіргі Шайыр ауы­лы) ауылдың есепшісі Нұрғазы мен қарапайым жұмысшы Сұлудың отбасында өмір есігін ашқан бесінші ұл. Өнегемен өркендеп, ұлағатпен сусын­ даған отбасындағы балалардың барлығы жастайы­нан қолына қазақтың қара домбырасын ұстады. 4­-5 жасқа келген бала Серік те ағаларына қарап бой  түзеп,  алғаш  болып Дәулеткерей Кәпұлының «Қосалқа» күйін үйренді. Мектепте оқып жүрген­ де аудандық көркемөнерпаздар фестиваліне қаты­сып, Құрманғазы Сағырбайұлының «Алатау» күйін орындап, жүлдегер атанды. Облыстық «Маңғыстау» телеарнасы ашылып, арнайы хабар дайындалғанда Шетпедегі №2 Берекет Жұмалиев атындағы орта мектептің 9­сынып оқушылары Серік Еңсегенов Дина Нұрпейісованың «Көңілашар» күйін шертсе, Жанбибі Дүйсенбаева Ғарифолла Құрманғалиевтың «Әнші дауысы» әнін шырқапты.

– Шетпедегі 10 жылдық мектепті бітіргеннен ке­йін әкемнің ақыл-­кеңесімен Алматы қаласындағы Қазақ ауыл шаруашылығы институтының (қазіргі Ұлттық аграрлық университет) ауыл шаруашылығы процестерін механикаландыру мамандығына оқуға түстім. Өзімнің қалауым заңгерлік немесе журна­листік мамандықты меңгеру болған еді. Жоғары оқу орнында оқып жүргенде А.Жұбанов атындығы ұлт аспаптар оркестрінің қыл қобызшысы және жеке домбырадағы солисі, институттың жанынан құрыл­ған «Алтын дән» фольклорлық ансамблінің дом­бырашысы, қыл қобызшысы болдым. Шет мемле­кеттерде гастрольдік сапарда болып, өнер көрсеттік. Қазіргі «Тамаша» ойын­сауық отауы алғашында, яғни 1978 жылдың сәуірінде «Тамаша» телевизиялық хабары көрерменге жол тартқанда әртістер Тұңғыш­бай Жаманқұлов, Сұлтанбек Құдайбергеновпен бірге өнер көрсеттім. Сонымен қатар «Алтыбақан» және «Ән­-78» телехабарларын да сазды сәлеммен көмкеруге атсалыстым. Менің өнердегі ұстазым – Құрманғазы атындағы академиялық ұлт аспаптар оркестрін ұйымдастырушылардың бірі, көптеген күйлерді кейінгі ұрпаққа жеткізуші, домбырашы және қобызшы, Қазақстанның мәдениет қайраткері Самиғолла Андарбаев болды. Оқу мен өнерді қатар алып жүрген сол кездер студенттік шақтардың бір қызықты дәурені еді, – деді Серік Нұрғазыұлы.

Жас маман туған жердің төсіне келіп, алғашқы еңбек жолын бастады. Шетпедегі «ПМК­-1203» құрылыс мекемесінде бас механик болып жұмысқа тұрды. Шайырдағы орта мектептің, Шетпедегі бала­ бақшалардың, басқа да әлеуметтік маңыздағыны­ сандардың құрылысында қолтаңбасы қалды.

1981–1986 жылдары комсомол қызметіне алын­ған елгезекте іскер маман алғашында нұсқаушы, кейін ұйымдастыру бөлімінің меңгерушісі, 2 хатшы болып абыройлы еңбек етіп, жастық күш­-қайратын танытты. Кейіпкеріміз 1986 жылы Қазақстан Ком­партиясы Маңғыстау аудандық комитетінің бірін­шісі хатшысы Сақып Керелбаевтың тапсырмасы­мен «Октябрьдің 50 жылдығы» совхозына (Шайыр ауылына) партком хатшысы қызметіне жіберілді. 1990 жылы Алматы Жоғары партия мектебіне оқуға түсіп, кейін жабылғанда КИМЭП­-ке ауысып, 1993 жылы саясаттанушы мамандығы бойынша бітіріп шықты. Білімін жетілдіріп, елге білікті маман бо­лып оралған Серік Нұрғазыұлы ел егемендік алған жылы «Маңғыстаумұнайгазға» қарасты автомобиль жолдары басқармасында (қазіргі «OSC» ЖШС) ше­бер, учаске бастығы, еңбекті қорғау жөніндегі бас техникалық жетекші қызметтерін атқарды.

Туып-­өскен мекенінде түрлі істің тұтқасын ұс­таған атпал азаматтың өткерген қызмет баспал­дақтарын тізбелесек, жекеменшік компанияларда әртүрлі лауазымда, жекеменшіктендіру жөніндегі басқарманың бөлім бастығы, ақпарат және қоғам­дық келісім басқармасы басшысының орынбасары, ҚР Мемлекеттік қызмет істері жөніндегі агенттік­тің Маңғыстау облысы бойынша басқармасының бастығы, шағын бизнес және кәсіпкерлік басқар­масының басшысы, мәдениет басқармасының басшысы, Маңғыстау облысының жұмылдыру дайындығы, төтенше жағдайлар басқармасы бас­шысының орынбасары, облыстық индустриалды­ инновациялық даму басқармасының шет елдермен байланыс бөлімінің басшысы қызметтерін жауап­кершілікпен атқарып, ат жалында жүрді.

Қандай іске болса да, белді бекем буып, батыл кіріскен кейіпкеріміз 2013 жылы «Нұр Отан» парти­ясы Ақтау қалалық филиалы төрағасының бірінші орынбасары қызметіне тағайындалды. Өткен жыл­дан бері «Қала жолдары» ЖШС директорының орын­басары. Ол еңбекқорлығының, білімділігінің арқа­сында жарқын жетістіктерімен, сіңірген еңбегімен құрметті. Осыдан 13 жыл бұрын «Қазақстанның мәдениет қайраткері» атанған Серік Нұрғазыұлы 1986 жылы Мәскеуде өткен ХІІ Дүниежүзілік жас­тар мен студенттердің фестивалін ұйымдастыруға және өткізуге атсалысқаны үшін «Еңбектегі озаты» үшін медалімен, «ҚР Конституциясына 10 жыл, 20 жыл» мерекелік медальдарымен де марапатталған.

Серік Еңсегенов пен жары Светлананы тағдыр табыстырып, 1979 жылы шаңырақ көтерген. Өмір­лік жарымен Алматы қаласындағы Қазақ ауыл ша­руашылығы институтында оқып жүргенде «Алтын дән» фольклорлық ансамблінде бірге өнер көрсеткен екен. Көсегесі көгерген отбасындағы перзенттердің бәрі де – жоғары білімді. Әр салада қызмет етіп, ұяда көрген ұлағатпен еңбек етіп жүрген жайлары бар. Еңбекте абыройлы, елге сыйлы кейіпкеріміз жұбайымен бірге 3 ұл­қыздан сүйген немере­ жиен­нің қызығына бөленіп отыр.

Шалғайдағы шағын Шайыр ауылында туып, об­лысқа танымал тұлға атанған қазақ азаматы туралы мөлтек сыр осындай. Басшылық, іскерлік, азаматтық­-кісілік қасиеттерін танытып, алпыстың асуына еселі еңбегімен, қажырлы қайратымен, ел­ жұртқа сыйлы абырой­-беделімен ат басын бұрған Серік ағамызды мерейлі жасымен құттықтап, дені­не саулық, отбасына баянды бақыт пен бақ-­береке тілейміз.

Фарида МҰҢАЛҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.