Алла тағаланың ерекше ықыласы түскен, шарапаты мол, ізгі ниетті іске сауабы көп Рамазанда, түндердің төресі болған, мың айдан қайырлы, періштелер жерге түсіп, жер бетінде береке орнайтын Қадір түні қарсаңында Маңғыстау облысының әкімі Ералы Тоғжанов ауыз бекіткен жұртшылыққа ауызашар берді. Облыстық «Бекет ата» мешітінде жайылған дастарханға ардагерлер, зиялы қауым өкілдері, қоғам белсенділері, жастар және 200-ге тарта мүжәлсіз отбасы шақырылды.
Аймақ басшысы Ералы Лұқпанұлы жиылған жамағатты қасиетті Қадір түнімен құттықтап, ұстаған оразалары, жасаған құлшылықтары, оқыған дұға-тілектері қабыл болуын тіледі.
- Қадірлі ағайын, құрметті жамағат! Айлардың сұлтаны, ең қайырлысы Рамазан айы мүбәрәк болсын! Әлемнің барша мұсылмандары бұл айға ерекше құрметпен қарап, ауыз бекітіп, пітір-садақа беріп, жетім-жесірге қолдау көрсетіп, игі амалдарды орындауға асығады. Қасиетті Қадір түні тілеген ізгі ниет-тілектеріңіз қабыл болсын! Қасиетті айда ұстаған оразамыз, жасаған дұға-тілектеріміз, құлшылық-ғибадаттарымыз, қайырлы амалдарымызды Алла қабыл еткей. Елімізге тыныштық, татулық, береке-бірлік,отбасымызға амандық нәсіп еткей, – деді ол.
Облыстық Бекет ата мешітінің бас имамы Смайыл Сейтбеков бес парыздың бірін орындап, ораза тұтқан жамағатқа уағыз айтып, имандылыққа ұйытты. Зиялы қауым өкілдері ұлағатты әңгімелер айтып, «ниет қабыл болып, ізгі амалдарға сауаптан жазсын!» деген тілегін білдірді.
Ауызашар соңында Құран оқылып, егемен еліміздің тыныштығы мен бейбітшілігі, халқымыздың береке-бірлігі үшін дұға жасалды.
Фарида МҰҢАЛҚЫЗЫ Суретті түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
