Қоныстанушыларға қолдау көп

Мұнайлы аудандық «Нұр Отан» үйінде екі қолға бір күрек таппай жүрген жұмыссыз жастарға, «Ата кәсіп – елге нәсіп» дегендей, белгілі бір кәсіпті дөңгелетсем деушілерге немесе «Бабы келіссе, бақ жанар» демекші, өзге атырапқа қоныс аударуға дайын тұрғындар үшін еліміздің Павлодар өңірінен және Шығыс Қазақстан облысының Риддер қаласынан келген арнайы өкілдердің қатысуымен бос жұмыс орындарының жәрмеңкесі өткізілді.

Жәрмеңкені Мұнайлы ауданы әкімінің орынбасары Берік Біләлов сөз сөйлеп ашып, Маңғыстау облыстық жұмыспен қамтуды үйлестіру жә­не әлеуметтік бағдарламалар басқармасы басшысының орынбасары Аманғали Нұрдаулетов, «Нұр Отан» партиясы Мұнайлы аудандық филиалы төрағасының бірінші орынбасары Мұқанжан Камалов алыстан ат арылтып келген меймандарға жылы лебіздерімен жұмыстарына сәтті­лік тіледі. Елбасы бағдарламасы бойынша Маңғыстау облысына жұмыс күштерін іздеп келушілермен аз-­кем тілдескен едік.

─ Бүгінгі күні біздің ауданымызға дәрігерлер, медбикелер, фельдшерлер, математика, ағылшын пәндерінің мұғалімдері және бастауыш сынып оқытушылары, мектепке дейінгі бала­бақшаларға тәрбиешілер, мемлекеттік қызметкерлер қажет. Бүгінгі күні бізде ауылдық округтердің бас мамандарына ар­налған 12 бос орын бар.

Біздің аудан – Павлодар облысындағы мал шаруашылығымен, өсім­дік өсірумен айналысатын аудан. Сол себепті бізге тәжірибелі трак­торшылар, сауыншылар, слесарьлар, суармалы егістікпен, жермен айналысатын, егін, көкөніс егуге құнтты азаматтар болса, біздің өңірге қоныс аударуларына болады. Өйткені біздің аудан Ертіс өзенінің жа­ғасында орналасқан. Су өте мол. Пайдаланылмай жатқан жерлеріміз көп. Қазіргі үкіметтің беріп жатқан несиелеріне байланысты жер алып, мал шаруашылығымен айналысуға ниетті азаматтарды біз өз жерімізге қуана шақырамыз. Шөп, мал азығы жағынан ешқандай мәселе жоқ.

Біздің аудан негізінен мал, жылқы және қой өсіреді. Бүгінгі күні ауданымызда 154 шаруа қожалығы бар. Соған сәйкес малды асылдандыру жұмыстары мұқият қолға алынған. Сондықтан біздің жаққа барып, үлкен іспен айналысамын деген кәсіпкерлер болатын болса есігіміз әрдайым ашық.

Әрине көшіп келуші отбасыларына, біріншіден, әрбір отбасы мүшесіне 35 АЕК (84179 теңге) мөлшерінде бір рет субсидия беріледі. Екіншіден, тұрғын үйді жалдау (жалға алу) бойынша шығыстарды өтеуге субсидия беріледі. Бұл жыл бойына, егер 1 адам болатын болса 15 АЕК, 2 адамнан 4 адамға дейін 18 АЕК, 5 адамнан жоғары болатын болса 21 АЕК көлемінде қарастырылған. Ауылдық жер болғандықтан үйлердің құны 500 мың теңгеден басталады да, аудан орталығында 3 млн. теңгеге дейін қымбаттайды. Қазір бізде бос үйлер өте көп. Өйткені 1941 жылдары депортация болды, білесіздер. Неміс, шешендердің барлығын біз жаққа көшірді. 1954 жылы тың игеру жұмыстары жүрді. Сондай науқан кезінде бізге көптеген басқа ұлттың адамдары келіп, тәуелсіздік алғаннан кейін өздерінің тарихи Отанына көшіп кеткендіктен бос үйлердің саны көбейіп жатыр. Одан кейін урбанизация процесі, жұрттың көбі Тұрғын үй құрылыс жинақ банкіне жинаған ақшаларын салып, қалаға көшіп жатыр. Соның әсері біздің ауылдық жерлерге бүгінгідей жағдайларды, мүмкіншіліктерді туғызып отыр. Біздегі жұмыс орындарының көбеюі неліктен? Кәсіпкерліктің жақсы дамуынан. Жергілікті халқымыз қара малмен, жылқы, қоймен, егін шаруашылығымен жақсы араласып жатыр. Мысалы, аумағымызда тары, бау­бақша егеді. Кәсіпкерлердің саны көбейіп жатқандықтан бізге жұмыскерлер тобы қажет боп тұр.

Мектептерге келетін болсақ, Май ауданы бойынша 14 мектеп бар. Біздің аудан – Павлодар облысындағы ең қазақы аудан. Бізде мектептер­дің, балабақшалардың және іс­-қағаздарының барлығы қазақ тілінде. Себебі біздің ауданның 90 пайызы жергілікті тұрғындар – қазақтар. Қалған, орыс, неміс ұлтының өкілдері қазақтанып кеткен, мемлекеттік тілде жақсы сөйлейді. Мектептердің материалдық­техникалық базасы өте жақсы деп айта аламын. Мысалы, 2 балаға бір компьютерден. Ол деге­німіз – өте үлкен жетістік. Барлық мектептерде жаңа модификациялық үлгідегі кабинеттер бар. Компьютерлерге жоғары жылдамдықтағы интернет қосылған. Әр кабинетке интерактивті тақталар қойылған. Яғни балалардың білім алуларына барлық жағдай жасалған. Бізде барлық мектептер бір ауысымда жұмыс жасайды. Өйткені балалардың саны өте аз. Мысалы, бір сыныпта 5­8 бала оқиды. Мектептеріміз бұрынғы кездері салынғанымен олардың барлығына күрделі жөндеу жұмыста­ры жасалынған. Қарасаңыз, қаланың мектептерінен артық болмаса, еш кемшілігі жоқ. Сондықтан математика, ағылшын, қазақ тілі пәндерінен білімі бар мұғалімдерге айтарым, ойланыңыздар, ­- дейді Павлодар облысы, Май ауданы әкімінің әлеуметтік мәселелер жөніндегі орынбасары Мадина Құсайынова.

Әсел ТАҢАТАРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.