Маңғыстау облысының әкімі үздік журналистерді марапаттады

Байланыс және ақпарат қызметкерлері күні облыс орталығындағы «Ақтау Палас» мейрамханасында облыс әкімі Ералы Тоғжанов өңіріміздің байланыс және бұқаралық ақпарат қызметкерлерінің бір тобына Алғыс хат тапсырды.

Салтанатты басқосуда құттықтау сөз сөйлеген Ералы Лұқпанұлы журналистика саласында қызмет істеп жүрген мамандардың қиын да қызықты қызметін атап өтті. Қай кезде де елдік, ұлттық саясатты жүргізіп, қоғамдық сананы қалыптастырудағы, оның ішінде бүгінгідей жаһанданудың күрделі кезеңіндегі ақпаратттық күрестегі ұлттық баспасөздің маңызына жете тоқталды. БАҚ-тың билік пен бұқара арасындағы алтын көпір екендігін, яғни елдік мәселелерде халықты жұмылдырып, ауызбіршілікке ұйтқы болуда да ерекше роль атқаратындығын айрықша атап өтті. «Елбасы атап өткендей: «Қазақстан қоғамы өмірінің ақпараттық құрамдасын біршама жоғарылатып, Интернет-технологияның мүмкіндіктерін азаматтарды ақпа­рат­тандыру, сондай-ақ мемлекет пен тұрғын­дар­дың тұрақты «кері байланысын» нығайту мәселелерінде де кеңейту міндеті тұр».

Олай болса, Сіздер Президентіміз Нұрсұлтан Әбішұлы Назарбаевтың cалмақты идеялары мен салиқалы бастамаларының төңірегіне  қоғамды топтастыру, ұлтты ұйыстыруға, тәуелсіз Қазақстанның ақпараттық кеңістігінің қалыптасуы мен нығаюына, еліміздің саяси тұрақтылығына, рухани-мәдени, әлеуметтік-экономикалық дамуына, қоғамның әл-ауқатын арттыруды жан-жақты насихаттауға  зор үлес қосып келесіздер», - деді. Сөз жоқ, Елбасының тапсырмалары, барлық мемлекеттік бағдарламалардың жемісті жүзеге асуы да, «Рухани жаңғыру» арқылы халықтың сана-сезімін жаңаша түлету бағытындағы қарқынды жұмыстар да бұқаралық ақпарат құралдары арқылы насихатталатыны белгілі. Ендеше бұл ретте журналистерге жүктелер міндет те орасан деп түйіндеді аймақ басшысы.

ТАҒЫ ОҚЫҢЫЗ: Театр тіршілігіне дем берген

Облыс басшысының марапатына ие болғандар арасында облыстық «Маңғыстау» газетінің қызметкерлері Жұмагүл Абланова, Лейла Мұратова, Валентина Қозыбақова, Фарида Мұңалқызы, "Маңғыстау-медиа" сайтының фототілшісі Талант Құсайын да бар.

Сондай-ақ Е.Тоғжанов журналистер күні аясында өткен спорт жарыстарының жеңімпаздарына арнайы сыйлықтар табыс етті. Бұл спорт ойындарында «Маңғыстау» телеарнасы бірінші, «Маңғыстау-Медиа» ЖШС ұжымы екінші орынды иемденген болатын. Осы ретте сөз алған «Маңғыстау-Медиа» ЖШС-не қарасты «Маңғыстау» газетінің бас редакторы Ғалым Әріп: «Жыл құсындай сағынтып жететін, баршамыз аңсай күтетін төл мерекеміз құтты болсын. Журналист қайда жүрсе де - журналист. Осынау қастерлі ұғымның, кәсіби мамандықтың бағасын біліп, Елбасының сындарлы саясатын жүргізуге атсалысып, әрі ақиқат жолында ақ адал маңдай тер төгейік», - дей келіп, құрмет пен ықылас үшін облыс басшысына жиналған қауымның ризашылығын жеткізді. Баспасөздің оқырмансыз өмір сүрмейтіндігін, мектеп оқушысынан қарияға дейінгі, облыс басшысынан қарапайым кісілерге дейінгі барлық санаттағы адамдардың баршасы да оқырман саналатынын,  сондықтан бұл бүкілхалықтық мереке екендігін  көпшіліктің назарына берді.

Мерекелік салтанат өте тағылымды, көңілді әуендер аясында тартымды өтті.

Валентина ҚОЗЫБАҚОВА Суреттерді түсірген Талант ҚҰСАЙЫН,

Серік МАЙЕМЕРОВ

[gallery td_select_gallery_slide="slide" ids="57075,57082,57078,57077,57079,57081,57076,57080,57120"]