Ақтау қаласының автобус паркі 70%-ға жаңартылды

Бұл туралы қоғамдық коммуникация орталығында өткен брифингіде Маңғыстау облысы жолаушылар көлігі және автомобиль жолдары басқармасының бөлім басшысы Асхат Құлтанов хабарлады.

Спикер Ақтау, Жаңаөзен қаласы мен аудандардағы автобустардың жағдайына тоқталып өтті.

-2020 жылдың қазанында Ақтау қалалық маршруттарға 18 дана «Yutong» маркалы отандық автобустар сатып алынды. Қазіргі уақытта автобустар Ақтау қалалық №3 және №7 маршруттарда қызмет көрсетуде.

Бұдан бөлек, 2021 жылдың басында қалалық маршрут тасымалдаушысы «Каспий Авто Парк» мекемесі «Ankai» маркалы 30 дана жылы жаңа автобустар әкелінген болатын. Қазір бұл автобустар қалалық №5, №4М және ауданаралық №107 маршруттарында жолаушы тасымалдауда. Алдағы уақытта Ақтау қалалық №2 және №4 маршрут тасымалдаушысы «Жолаушы-Ақтау» ЖШС-нен «Ақтау қалалық автобус парктерін жаңарту жобасы» аясында БРК-Лизингтің лизингтік бағдарламасын пайдалана отырып тағы 16 дана жаңа автобус сатып алу үшін әкімдікке бастапқы төлемді төлеу арқылы қолдау көрсету жөнінде өтініш берді. Алуға ниет білдіріп отырған автобус типі отандық – Yutong маркалы автобус. Бұл автобустардың келуі нәтижесінде Ақтау қаласының автобус парктерінің жаңару деңгейі 100 %-ға жететін болады,- деді Асхат Құлтанов.

Қазіргі уақытта Маңғыстау облысының экономика және бюджеттік жоспарлау басқармасы тарапынан салалық қорытынды берілді. Жобаны қаржыландыруға жергілікті бюджет есебінен бастапқы 20% жарнасы, 166 400 мың теңге «Каспий» ӘКК-не жіберілді. Қазіргі таңда, «Каспий» ӘКК тарапынан лизинг беруші банкті анықтау мақсатында конкурстық рәсімдер жүргізілуде.

Жалпы, автомобиль көлігімен жолаушыларды тасымалдау 32 тұрақты маршрут арқылы жүзеге асырылады. Оның ішінде: қалалық (қала маңындағы) – 11, ауданаралық (облысішілік қалааралық) – 12, ауданішілік – 9. Облыс маршруттарында 200-ге жуық автобус жұмыс істейді.

Спикер Жаңаөзен қаласы бойынша да тоқталып өтті. Шаһарда 5 маршрут, 15 автобус қызмет көрсетеді. Алдағы уақытта тасымалдаушы «Каспий Авто Парк» ЖШС өз қаражаты есебінен, 2022 жылдың 2-ші тоқсанының соңына дейін Жаңаөзен қаласы мен оған іргелес ауылдары 2 маршруттарына 6 дана заманауи автобуспен толықтырады.

Мұнайлы-Ақтау бойынша қатынайтын №105 бағыты да алдағы уақытта толықтырылмақ. Тасымалдаушы өз қаражаты есебінен ISUZU маркалы 12 автобусты осы жылдың 3-тоқсанына дейін алып келу жоспарланып отыр. Сондай-ақ, Ақтау-Сайын Шапағатов, Ақшұқыр бағыты бойынша автобустарды да толықтыру көзделіп отыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.