Психолог: ҰБТ тапсыратын түлектерге жан-жақты қолдау қажет

Биыл Маңғыстауда 8086 түлек мектепті бітіреді. Оның 7 мыңнан астамы ҰБТ тапсыруға өтініш берген, деп хабарлайды mangystaumedia.kz Қоғамдық коммуникация орталығына сілтеме жасап.

Педагог-психолог Перизат Тәжіғұлова ата-аналар бала үшін осы кезеңнің маңызын түсініп, жан-жақты қолдау көрсетуі қажет деген пікірде.

Ақтаудағы №19 мектепте қызмет атқаратын Перизат Тәжіғұлова 17 жылдан бері педагогика, психология саласын зерттеумен айналысады. Ол оқушыда ҰБТ тапсырар алдында қобалжу, күйзеліс секілді түрлі эмоциялар болатынын айтады.

- Биыл мектебімізде 86 түлек ұлттық бірыңғай тестілеуден өтеді. Оқушылар бойындағы үрей-қорқынышын сейілту мақсатында психологиялық тренингтер, семинар-сабақтар және диагностикалар жүргізілді. Сонымен қатар, мамандық таңдауда бағыт-бағдар берілді. Осындай кезеңде ата-ананың балаға қолдау мен сенім білдіруі өте маңызды. Түлектер бойын қорқыныш билеген сәтте 1 санынан 10-ға дейін немесе керісінше санап, бақытты сәттерін еск алғаны жөн, - деді Перизат Тәжіғұлова.

Маңғыстау облыстық білім басқармасының мәліметінше биылғы оқу жылында 152 «Алтын белгі» иегері, 531 үздік аттестатқа үміткер оқушы бар. Маңғыстау облысы бойынша 3 ҰБТ өткізу пункті белгіленген. Атап айтқанда, Ақтау қаласындағы 1-шағынауданда орналасқан Ustudy орталығы, Жаңаөзен қаласындағы лицей базасы және Бейнеу ауданында Ы.Алтынсарин атындағы жалпы білім беретін мектеп.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.