Маңғыстауда үздік оқушылар мен жас ғалымдар марапатталды

Бүгін Достық үйінде облыстағы дарынды оқушылардың жетістіктері насихаттау, оқушылардың интеллектуалдық және шығармашылық дамуына жағдай жасау мақсатында «Білімім - Отаныма» атты тәрбие сағаты өтті, деп хабарлайды mangystaumedia.kz.

Республикалық бірыңғай тәрбие сағатының аясында халықаралық, республикалық деңгейдегі олимпиадалар мен ғылыми жобалар, шығармашылық байқаулар, робототехника, «Worldskills» кәсіби шеберлік чемпионатының жеңімпазы атанған 200-ден аса оқушы қатысты.

Жиынға Маңғыстау облысы әкімінің орынбасары Звира Есбергенова, МО Білім басқармасының басшысы Динара Жұмашева, білім беру ұйымдары өкілдерінің қатысты.

Тәрбие сағаты оқушылардың Гимнді айтуымен басталды. Әрі қарай ҚР Оқу-ағарту министрінің құттықтауын тыңдады. Шарада облыс әкімінің орынбасары Звира Түгелқызы үздік оқушыларды оқу жылының аяқталуымен құттықтады.

«Заманауи әлемде елдің қуаты ең алдымен азаматтарының білімімен өлшенеді. Бүгінгі күні Отанымызға қызмет ету, еліміздің атағын аспандату, құндылықтарын қорғау үшін сапалы білім керек. Адамзаттың жетер еңбек шыңы білімді толық меңгерген күні. Құрметті оқушылар, сіздер түрлі байқауда өңіріміздің атын шығарып, білім саласының өркендеуіне үлес қостыңыздар. Тағы бір оқу жылын табысты аяқтағандарыңыз құтты болсын», деді Звира Түгелқызы.

Шарада оқушылар «Менің жетістікке жету жолым», «Мамандық - үлкен таңдау», «Отанымды сүйемін» және ұлттық құндылық, ғылымға құштарлық, маңғаз өлкенің жауһарлары, адамның тұлға болып қалыптасуы бағытында өз тәжірибелерімен бөлісті.

Сонымен қатар, оқу жылында ауыл олимпиадасының республикалық кезеңінде үздік нәтиже көрсеткен мектептер мен үздік оқушы марапатталды. Атап айтсақ, 9-11 сынып оқушыларына арналған жалпы білім беретін пәндер бойынша республикалық ауыл олимпиадасында үздік нәтиже көрсеткен Түпқараған ауданы, Ақшұқыр мектеп-гимназиясы, Мұнайлы ауданы, Шоғы Мұңалұлы атындағы №5 жалпы білім беретін мектеп, Түпқараған ауданы Ғұбайдолла Айдаров атындағы №1 мектеп-лицейі «Ең үздік ауыл мектебі – 2024» атағына ие болса, «Үздік ауыл мектебінің оқушысы – 2024» атағын Маңғыстау ауданы М. Атымов атындағы №6 жалпы білім беретін мектептің 11-сынып оқушысы Жүсіп Нұрсәуле иеленді.

Бұдан бөлек, республикалық олимпиада мен түрлі байқау жеңімпаздарына ақшалай сертификаттар мен үздіктердің ата-аналарына алғыс хаттар табысталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.