Маңғыстауда бюджет қаражатының басым бөлігі мемлекеттік бағдарламаларға жұмсалған

2021 жылы бюджет қаражатының басым бөлігі әлеуметтік, инженерлік және транспорттық инфрақұрылымдарды дамытуға бөлінді. Бұл туралы Маңғыстау облысы қаржы басқармасы басшысының орынбасары Тамара Нсанбаева хабарлады.

Оның айтуынша, аталған шығыстар «Ауыл-Ел бесігі», «Өңірлерді дамыту», «Нұрлы жер», «Жұмыспен қамтудың жол картасы» бағдарламалар аясында қаржыландырылып, іске асырылған.

- «Ауыл - Ел бесігі» бағдарламасы аясында Түпқараған ауданының Ақшұқыр және Баутин ауылдарында спорт кешендерінің құрылысы жүргізілсе, Жаңаөзен қаласының Рахат және Қызылсай ауылдарында дәрігерлік амбулаторияның, ал Бейнеу және Өмірзақ ауылдарында қолданыстағы мектептерге қосымша ғимарат салынды. Бұдан бөлек Қарақия, Түпқараған, Маңғыстау және Мұнайлы аудандарында ауылішілік жолдардың құрылысы мен орта жөндеу жұмыстары жүргізілді, - деді Тамара Нсанбаева.

Ал, «Нұрлы жер» бағдарламасымен Форт-Шевченко қаласы мен Батыр ауылдарында халықтың әлеуметтік-осал топтары үшін тұрғын-үйлер салу, Бейнеу, Түпқараған аудандары мен Ақтау, Жаңаөзен қалаларында тұрғын-үй құрылысына арналған жер телімдерін инженерлік инфрақұрылыммен қамтамасыз ету жұмыстары жүргізілген. Сонымен қатар, өңірдегі ауыз су тапшылығын шешу мақсатында тәулігіне 40000 м3 ауыз су өндіруді ұлғайту бойынша Ақтау қаласындағы «Каспий» су тұщыту зауытының қуатын кеңейту жұмыстары жүргізілуде.

Бұл бағдарламалар шеңберінде жүзеге асырылған жобалар ауылдық елді мекендерді орталықтандырылған ауыз сумен қамтуға, тұрғын-үй салуға бөлінген жаңа жер телімдерін су, тоқ, газ және кәріз желілерімен қамтуға, қанағаттандырарлық жағдайдағы жергілікті маңыздағы жолдар үлесін арттыруға бағытталған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.