Бүгін жылжымалы егу пункті Ш. Есенов атындағы Каспий мемлекеттік технология және инжиниринг университетіне барды. 30-дан аса университет қызметкері вакцина салдырды, - деп хабарлайды mangystaumedia.kz сайты.
Алдымен дәрігер вакцина алатын адамға анкета толтыртып, дене қызуын өлшеді. Содан соң қан қысымы, жүрек соғысы, созылмалы аурудың бар-жоғын анықтап, жалпы денсаулыққа қатысты ақпаратты сұрап алды.
Вакцина салған адамның көбі өзін жақсы сезінетіндерін айтты.
«Бүгін университеттің профессор, оқытушы құрамы екпе салдыртты. Қазір өзімді жақсы сезініп тұрмын. Өзімізді, отбасымызды және айналадағы адамдарды қорғаудың жалғыз жолы вакцина екенін білемін. Сондықтан батылдық танытып, екпе алдым», - дейді Ш. Есенов атындағы Теңіз академиясының директоры Болат Сәрсенбаев.
Дәрігердің айтуынша, екпе алған адамда дененің ауырсынуы, әлсіздік, бас ауру, температура 36, 37 градуска көтерілуі мүмкін.
«Бірақ мұндай әсерлерден қорықпауға болады. Бұл – қалыпты жағдай. Вакцина аяғы ауыр немесе емізулі баласы бар әйелдерге, онкологиялық диспансерде тіркелген адамдарға, қызуы көтеріліп, ауырып тұрғандарға салынбайды», - дейді дәрігер Ботакөз Қуанышқызы.
Бүгін вакцина алғандарға 21 күннен кейін қайта екпе салынады.
Жұлдызай ҚАЛИЕВА
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
