Каспий жағалауында қоқыс көп

Теңіз жағалауындағы демалушылар арасында түсіндіру жұмыстары жүргізілді, - деп хабарлайды mangystaumedia.kz сайты.

Атап айтқанда облыстық экология департаменті, табиғи ресурстар және табиғатты пайдалануды реттеу басқармасы, Ақтау қаласы әкімдігінің тұрғын үй-коммуналдық шаруашылық бөлімінің өкілдері теңіз жағалауында өңір тұрғындары мен қонақтарын демалыс орындарын ластамауға шақырды.

Маңғыстау облысы экология департаменті басшысының орынбасары Сағдат Хансейітов барлығына күйе жағудан аулақ және экологиялық мәдениетті қалыптастыру мақсатында осындай шараларды жүргізу қажет екенін айтты.

"Өзінен кейін қоқыс тастайтындар ең алдымен осы аумақтардың тазалығына жауапты мамандардың еңбегін бағаласа деймін. Әр адам өзін сыйласа, мұндай жағдайға жол бермес еді. Сондықтан да бұқаралық ақпарат құралдары мен әлеуметтік желілер арқылы барша маңғыстаулықты, тұрғындар мен қонақтарды айналаны таза ұстауға, қоқыстарды шашпай, арнайы орындарға тастауға және экологиялық мәдениетті қалыптастыруға шақырамын. Экологиялық мәдениет адамның сана-сезімін дамытуға ғана емес, сонымен қатар мемлекеттің әл-ауқатының өсуіне де негіз болады", - дейді Сағдат Батырбекұлы.

Маңғыстау облыстық экология департаментінің баспасөз қызметінің айтуынша, демалыс орындарын ластаушыларды жауапқа тарту құзыреті полиция қызметкерлеріне берілген. Алдағы уақытта экологтар тәртіп сақшыларымен бірлескен рейдтік шаралар өткізуді жалғастырмақшы.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.