Бір топ тұрғын теңіз жағалауын тазалады

Демалыс күні Ақтау қаласының бір топ тұрғыны теңіз жағалауына тазалық жұмыстарын жүргізді, - деп хабарлайды mangystaumedia.kz сайты.

Олар теңіз жағалауында шашылып жатқан қоқыстарды жинап, отырғыштарды сырлаған. Қоқыс тастайтын жәшіктер мен «I love Aktau» жазуы бар инсталляцияны жуып шыққан.

Ерікті тұрғындар теңіз жағалауын жинауды түнгі сағат 00:00-де бастап, таңғы 04:00-те аяқтаған.

Мұндай бастамаға өңірге белгілі шахматшы Анвар Шайхымов себепші болған. Оның айтуынша, теңіз жағалауының қоқысқа толып, адам көп шоғырланатын жердің ластанып жатқаны алаңдатқан.

«Осыдан 1 апта бұрын теңіз жағалауын тазалау керек деп ойладым. Қасымда жүрген достарыма айттым, бірден қолдады. Сөйтіп әр саланың мамандарынан жиналған 20 шақты адам қажетті құрал-жабдықтарды алып, жұмысты бастап кеттік. Мұндағы мақсатымыз – көз тартар теңізді одан сайын көркейту. Қала тұрғындарын тазалықты сақтауға шақыру», - дейді Анвар Шайхымов.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.