"Еңбек" бағдарламасы: 12 мыңға жуық адам жұмысқа орналасты

"Nur Otan" партиясы Маңғыстау облыстық филиалы жанындағы партиялық бақылау комиссиясының және сыбайлас жемқорлыққа қарсы іс-қимыл жөніндегі қоғамдық кеңестің отырысы өтті, - деп хабарлайды mangystaumedia.kz сайты.

Отырысқа партиялық бақылау комиссиясының төрағасы Исахан Сағынбаев және орынбасары Мұханбет Жайлыбаев, партиялық бақылау комиссиясының инспекторы Арыстан Хибасов және комиссия мүшелері «Zoom» платформасы арқылы қатысты. Күн тәртібінде бөлінген бюджет қаражатының тиімді жұмсалуы, сыбайлас жемқорлық тәуекелдерін болдырмау, халыққа сапалы қызмет көрсету сияқты мәселелер қаралды.

Маңғыстау облыстық кәсіпкерлік және сауда басқармасы басшысының орынбасары Мұқанбетжан Көбеген, аймақтық жұмыспен қамтуды үйлестіру және әлеуметтік бағдарламалар басқармасы басшысының міндетін атқарушы Әсет Шопанов, өңірлік мемлекеттік кірістер департаментінің басшысы Данияр Жаналинов, облыстық энергетика және тұрғын үй-коммуналдық шаруашылық басқармасы басшысының орынбасары Нұрлан Орынбасаровтың баяндамасы тыңдалды.

2017-2021 жылдарға арналған «Еңбек» бағдарламасы аясында Ақтау және Жаңаөзен қалаларында шағын несие беру үшін республикалық бюджеттен 700,0 млн теңге бөлінген. Қаражатты толық игеру қазан айына жоспарланған. Биыл 27 шілдеге дейін «Ауыл шаруашылығын қолдау қоры» АҚ арқылы 466,4 млн теңгеге 43 өтінім қабылданды, оның ішінде 294,3 млн теңге 28 шағын несие берілді, 53,3 млн теңгеге 4 шағын несие мақұлданды және 118,8 млн теңгеге 11 шағын несие қаралу үстінде. Сонымен қатар 143,3 млн теңгеге 10 кәсіпкер құжаттарын жинақтау үстінде. Жүйелі мәселелер қатарында «Ауыл шаруашылығын қаржылай қолдау қоры» АҚ-да қызметкерлердің жетіспеушілігі себебінен Жаңаөзен қаласынан толық құжатпен дайын келген кәсіпкерлердің құжаттары уақытында қабылданбауда, осы мәселе кәсіпкерлердің наразылығын туғызуда. Айта кетейік, нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» бағдарламасының талаптарына сәйкес, 20 % стартап болуы қажет. Қазіргі таңда стартап жобалар 18% құрап отыр.

Баяндамашыға комиссия мүшелері сұрақтарын қойып, әкімшілік кедергілерді жою жөніндегі ұсыныстарын айтты.

Жыл басынан бері «Еңбек» мемлекеттік бағдарламасына 15 мыңнан (15 610 адам) астам адам қатысушы ретінде танылып, 13 мыңнан (13 438 адам) астам адамы әртүрлі жұмыспен қамтудың белсенді шараларымен қамтылған. Аталған бағдарлама шеңберінде биыл қаражат есебінен 124 адамға 773 млн теңге көлемінде шағын несие берілді және рефинансирование қаражаты есебінен 122,2 млн теңгеге 29 адамға несие берілген. «Бастау Бизнес» жобасы бойынша 769 адам онлайн оқыту арқылы оқуға жолданды. Қысқа мерзімді кәсіптік оқумен 48 адам қамтылды, жыл соңына дейін 403 адам қамтылу қажет. Бұл шараға жергілікті бюджеттен 56,8 млн теңге бөлініп отыр. 2021 жылы жаңа бизнес-идеяларды іске асыру үшін республикалық бюджеттен 607 адамға 354,1 млн теңге бөлінді. Бүгінгі күні 490 адамға 286 млн теңге көлемінде мемлекеттік грант берілді. Сонымен қатар жыл басынан бері Бағдарламаның үшінші бағыты шеңберінде 12 мыңға жуық адам немесе бағдарламаға қатысушылардың 77 пайызы жұмысқа орналасты. Оның ішінде 7 мыңға жуық адам тұрақты жұмыс орындарына орналастырылды.

Облыстың коммуналдық желілері мен инфрақұрылым құрылысына бөлінген қаражаттар туралы есебі тыңдалды. Орталықтандырылған су жүйесімен қамту көрсеткіші қалаларда халық саны бойынша 100% құраған. «Нұрлы жер» және 2020 жылға дейінгі өңірлерді дамыту бағдарламалары аясында 2019-2021 жылдары сумен және су бұрумен қамту бойынша жалпы ұзындығы 1 188,74 км және құны 55,0 млрд теңгені құрайтын 35 жобаны іске асыруға бюджеттен 27,5 млрд теңге бөлінген.

Маңғыстау облысы бойынша мемлекеттік кірістер департаментінде 31 түрлі мемлекеттік қызметтер бекітілген, оның ішінде 23 тегін түрде және 8 ақылы түрде көрсетіледі. Электрондық нысанда 5 мемлекеттік қызмет түрі көрсетіледі, 24 мемлекеттік қызмет түрі қағаз тасығышта және электрондық нысанда, 2 мемлекеттік қызмет түрі тек қағаз тасығышта көрсетіледі. Маңғыстау облысы мемлекеттік кірістер департаментімен 2020 жылы 1 896 072 мемлекеттік қызмет көрсетілген, электронды түрде көрсетілетін мемлекеттік қызметтердің үлес салмағы 96,3 % құрады. Қызметтерді автоматандыруды үшін Ақтау мен Жаңаөзен қалалары, сондай-ақ Мұнайлы және Бейнеу аудандары бойынша МКБ электрондық кезек жүйесі арқылы жүзеге асырылады. Сонымен қатар, салық төлеушілерге қолайлы жағдай жасау мақсатында бүгінгі күнге онлайн брондау қызметі www.kgd.gov.kz ресми интернет ресурсында, «eSalyk Azamat» мобильді қосымшасында арқылы қолжетімді. Департаментпен ағымдағы жылдың 6 айының қорытындысына сәйкес 695 503 мемлекеттік қызмет көрсетілген, оның ішінде қағаз жеткізгіште 22 683 немесе 3,2% және электронды түрде 672 820 немесе 96,7% құрады. Сондай-ақ, барлығы 695 503 құрайтын мемлекеттік қызметтерді 401 499 жеке тұлғалар мен 294 004 заңды тұлғаларға көрсетілген.

Күн тәртібінде көтерілген мәселелер бойынша баяндамалар тыңдалып, сұрақтар қойылып, талқыланды. Партиялық бақылау комиссиясының мүшелері аталған жұмыстарды жүйелендіру бойынша өздерінің ұсыныстарын берді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.