Мұнайлы ауданындағы Маңғыстау мен Басқұдық ауылдарын қосатын 10 шақырым жолдың жөндеу жұмыстары жүріп жатыр. Бұл туралы Мұнайлы ауданы әкімінің орынбасары Нұрбек Қарасаев мәлімдеді, - деп хабарлайды mangystaumedia.kz сайты.
«Бұл бағытта бұрын да асфальт жол бар еді. Алайда ол жолдың сапасы нашарлаған. Қарама-қарсы бағыттағы көліктер еркін өте алмайды. Жөндеу жұмыстары кезінде жол кеңейтіледі. Жөндеуге жауапты мердігер мекеме жұмысын бастап кетті. Қазір ескі жолды сүріп тастап, астына құм төсеп, тегістеп жатыр», - деді Нұрбек Қарасаев.
«Маңғыстау-Басқұдық» бағытындағы жол 4 жолақты болады. Оған 12 техника мен 15 қызметкер жұмылдырылған. Жөндеу жұмыстарына шартты түрде 3 ай мерзім берілген. Алайда мердігер мекеме жөндеу жұмысын белгіленген мерзімнен бұрын бітіруі мүмкін.