Жаңаөзен қаласының «Астана» шағынауданында орналасқан жылыжайда жылына 50-60 мың тоннаға жуық өнім өндіріледі, деп хабарлайды mangystaumedia.kz.
Жылыжайдың иесі Ғайболла Қабылұлының айтуынша, жылына екі рет өнім алады екен. Күзде – қызанақ, көктемде – қияр мен қызанақты жинайды. Бір түп қызанақ тоқсан күннің айналасында толықтай піседі.
«Осы жерде көкөністің төрт мыңдай түбі отырғызылған екен. Еңбектің арқасында өнімдеріміз жылдан-жылға жақсы нәтиже беруде», - дейді ол.
Жылыжайдың аумағы 24 соттық. Бұл жерде 9 мың түптей қияр егілген.
«Ең аз дегенде елу-алпыс тоннадай өнім береді деп отырмыз. Барлығы күтімге байланысты. Қаңтар-ақпан айында бірінші лек егілсе, екінші легі шілде айының ортасында жаңадан отырғызылады. Піскен өнімді бір күн тастап теріп отырамыз және арнайы пакетке саламыз. Бәсекелестік бар. Өнімдерді ірі сауда нүктелеріне көтерме бағамен сатамын», - дейді кәсіпкер.
Қазақстан нарығын сырттан емес, өзіміздің отандық өніммен қамтамасыз етуге бағытталған жаңаөзендік кәсіпкердің әрекеті өз жемісін беруде. Жылыжай бес-алты азаматты тұрақты жұмыспен қамтып отыр. Алдағы уақытта жылыжай иесі осы бастамасын кеңейтуді көздеп отыр.
Осыдан 11 жыл бұрын Елбасы Н. Назарбаевтың бастамасымен «Агробизнес – 2020» бағдарламасы жүзеге асқан болатын. Аталмыш бағдарлама аясында субсидиялауда өзгерістер орын алды. Нәтижесінде еліміздің әр аймағына қысы-жазы жаңа піскен көкөністер үздіксіз жеткізіле бастады. Жылыжайдың әр гектарына бөлінген қаржыға тыңайтқыштар, тұқым алынып, шаруашылық иелеріне мемлекет тарапынан көмек берілді.