Ғарыштық мониторинг нәтижесінде Маңғыстау өңірінде заңсыз қоқыс тасталған аумақтар анықталып жатыр. Тіпті, салынып жатқан айыппұлдар бұған тосқауыл болмай тұр. Қоқысты бей-берекет төгетіндерге түсіндіру жұмыстары жүргізілгенімен, қоқыс үйінділері өңірдің экологиясына кері әсерін тигізетінін біле тұра осындай әрекетке баратындар қатары азаяр емес.
Мәселен, бүгін Ақтау қаласындағы 29а шағынаудан аумағында үйіліп жатқан күл-қоқысты Ақтау қаласы әкімдігінің тұрғын-үй коммуналдық шаруашылығы бөлімі мен облыстық экология департаментінің мамандары тазартқан болатын. Бір ғана нүктенің өзінен 200 тонна тұрмыстық қалдық шықты. Жуырда ғана шаһардағы 15 шағынаудан аумағынан 4 300 тонна қалдық шығарылған.
Маңғыстау облыстық экология департаменті басшысының міндетін атқарушы Сағдат Хансейтовтың айтуынша, Энергетика министрлігі мен «Қазақстан Ғарыш Сапары» ҰК» АҚ арасында келісімшарт жасақталған. Оның аясында Геопортал құрып, спутниктен жерді қашықтан зондтау арқылы рұқсаты жоқ қоқыс полигондарының ғарыштық суреттері ұсынылады. Ғарыштық мониторинг барысында 2020 жылы 148 заңсыз орын анықталған және оның 95 пайызы жойылған. Ал жыл басынан бері 211 нүкте анықталып, оның 114 -і жойылды.
Айта кету керек, Экологиялық кодекске сәйкес, коммуналдық қалдықтарды бөлек жинау, сақтау, ұдайы әкету, қайта өңдеу, кәдеге жарату және залалсыздандыру, сондай-ақ елді мекеннің аумағын тазартуды жүзеге асыру, коммуналдық қалдықтарды жинаудың ұтымды және экологиялық қауіпсіз жүйесін ұйымдастыру жұмыстары жергілікті атқарушы органдарға жүктелген.
Сондай-ақ Маңғыстау облыстық экология департаменті, облыстық табиғи ресурстар және табиғат пайдалануды реттеу басқармасы, Ақтау қалалық әкімдігі тұрғын-үй коммуналдық шаруашылығы және табиғат қорғау полициясы бірлескен рейдтік шараларды жүргізудің нәтижесінде белгіленбеген орынға заңсыз қоқыс төккен 56 тұлғаға қатысты әкімшілік айыппұл салынды.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
