Ақтауға Иран Ислам республикасынан 53 қандас келді

Бүгін Ақтауға Иран Ислам республикасынан 53 қазақ келді. Оларды Ақтау қаласы әкімдігінің мамандары мен туыстары күтіп алды, - деп хабарлайды mangystaumedia.kz сайты.

Келген қазақтар көші-қон бағдарламасы аясында Солтүстік Қазақстан облысына қоныстанады.

«Бүгін Иран Ислам республикасынан 27 отбасы оралды. Қазір келген адамдарды уақытша жатақханаға орналастырамыз. Онда барлық жағдай жасалған. Құжаттарын реттеп алғаннан кейін Нұр-Сұлтан қаласы арқылы Солтүстік Қазақстан облысына барады», - дейді Ақтау қаласы әкімінің орынбасары Әбілқайыр Байпақов.

«Мен жұмыс бабы бойынша Иранның Боржут қаласында тұрдым. Қазақстанға әпкем және қызыммен келіп отырмын. Атамекенге келгеніме, сіздер жылы қарсы алып жатқанына қуаныштымын», - дейді Иран Ислам республикасынан келген Хадиша Адай.

Елге 1995 жылы қоныс аударған Жаңыл Қазақтың кіші інісі де осы көшпен атамекенге оралды.

«Менің анам 16 бала туған. Мен үйдің үшінші баласымын, ал інім - үйдің кенжесі. Інімнің отбасымен бірге аман-есен елге жеткеніне қуанып тұрмын. Енді 9 ағайындының басы қосылды. Әлі Иран Ислам республикасында 5 туған бауырым бар», - дейді Жаңыл Қазақ.

«Горган деген қаладан 35 шақырым жерде Түркмен деген ауыл бар. Сол жерде 34 жыл бойы тұрдық, сонда оқып, өстік. Туыстарым атамекенге оралған соң мен де елге келуге, ағайын-туыстың қасында болуды дұрыс деп санадым. 4 баламды өз еліне қосып отырмын. Жастайынан өз туған тілінде сөйлеп, тарихын танып, елі үшін еңбек еткенін қалаймын. Елге келгеніме, бізді қарсы алып жатқан отандастарыма алғыс білдіремін», - дейді Неджип Қазақ.

Жұлдызай ҚАЛИЕВА

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.