Маңғыстау облысындағы қуаңшылық салдарынан 1 163 мал басы қырылған. Бұл туралы Маңғыстау облысы әкімінің орынбасары Ғалымжан Ниязов айтты, деп хабарлайды ҚазАқпарат.
«Статистикалық мәліметке сәйкес, осы жылдың 1 тамыздағы жағдай бойынша облыста 629 336 мал басы бар. Ал ауыл шаруашылығын біріздендіру базасында тіркелген мал басы - 639 493. 77 мың тонна мал азығын дайындау жоспарда болды. Маңғыстау, Бейнеу, Қарақия, Түпқараған, Мұнайлы аудандарына 41 470 тонна шөп әкелінді. Қыс айларына 35 530 тонна шөп әкелуді жоспарлап отырмыз. 25 530 тонна көп өзге облыстардан тасымалданады. Ал облысымыздың аумағында 10 мың тонна шөп шабылады. Жыл ортасында мал азығына сатып алуға 204 млн теңге бөлінді. Оның ішінде 150 млн теңгесі басқа облыстардан шөп тасымалдауға жұмсалды. Шөп 1 келісі 55 теңгеден сатылды. Мұнан бөлек жемге 54 млн теңге жұмсалды. Енді алдағы қыс айларына Үкімет қолдауымен мал азығын алуға 5,3 млрд теңге жоспарланып отыр. Қазіргі уақытта оның 1,4 млрд теңгесі бөлінді. Жем сатып алуға бөлінген қаражаттың сомасы – 1 млрд теңге. Қаржы аудандарға мал басы санына қарай бөлінеді», - деді облыс әкімінің орынбасары орталық коммуникациялар қызметіндегі баспасөз мәслихаты барысында.
Оның атап өтуінше, қазіргі уақытта Ақмола, Қостанай, Солтүстік Қазақстан облыстарынан мал азығын жеткізу бағытында жұмыс жүргізіліп жатыр.
Бұл ретте «Қазақстан темір жолы» компаниясы жем-шөп тасымалдау қызметі үшін Маңғыстау облысына 75 пайыздық жеңілдік беріп отыр.
«Облысымызда біреулер 5 мың мал басы қырылды деп жүр. Сәуірде әр ауылдың жанынан биотермиялық шұңқыр қазып, 1 163 өлген малды көмдік. 1 163 малдың тек 194-і ғана тіркелген. Қалған малдың иесі жоқ, иесі кім екендігі белгісіз. Мал өліміне қатысты 7 азаматтан ғана арыз түсті»,- деді Ғалымжан Ниязов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
