Ақтауда мемлекеттік қызметшілер вакцина салдырды

Ақтау қаласы әкімдігінің мемлекеттік қызметшілері коронавирусқа қарсы «Спутник V» вакцинасын салдырды, - деп хабарлайды mangystaumedia.kz сайты.

Ақтау қаласының әкімі Нұрдәулет Қилыбай, қала әкімінің орынбасары Малик Абдыкадыров, Өмірзақ ауылы әкімінің м.а, тұрғын-үй коммуналдық шаруашылығы бөлімі, ішкі саясат бөлімі, кәсіпкерлік және ауыл шаруашылығы бөлімі, қалалық әкім аппаратының 20-ға жуық мемлекеттік қызметкері алдымен дәрігерлердің тексеруінен өтіп, жексенбіден бастап екпе салдырды.

Екпе салдырғаннан кейін 30 минут бойы дәрігер бақылауында болған. Олар «Спутник V» вакцинасының ешқандай кері әсері байқалмағанын айтады. Енді мамандар 21 күннен кейін осы вакцинаның екінші компонентін алады.

Сондай-ақ осыған дейін облыстық әкімдік қызметкерлері вакцина салдырған болатын.

Айта кетейік, вакциналауға профилактикалық егуге қарсы көрсеткіштері жоқ адамдар жіберіледі. Вакциналау алдында дәрігерлер тұрғындарды міндетті түрде тексеруден өткізеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.