Өңірде коронавирусқа қарсы егу жұмыстары жалғасып жатыр. Кеше мұнайлылық 125 адам ресейлік Спутник-V вакцинасын қабылдады. Оның 10-ы мемлекеттік қызметкер, екеуі депутат, сегізі мұғалім. Қалғандары медицина саласының мамандары. Жалпы 115 адам вакциналаудың бірінші кезеңінен өтті. Ал 10 адам екінші мәрте екпе салдырды.
Екпе алуға келгендер алдымен медициналық тексерістен өтті. Дәрігерлер қан қысымы мен дене қызуын өлшеді. Денсаулықтарында еш ақау болмаған соң, егу бөлмесіне жіберілді. Олардың қатарында аудандық әкімдік қызметкерлері мен депутаттар да бар.
Ержан Күмісқалиев - Мұнайлы ауданы әкімінің орынбасары
Түстен кейін тағы да жалғасып жатыр. Міне өзім де жаңа вакцина алып шықтым. Өзімді жақсы сезініп тұрмын. Өзім ерікті түрде келдім енді ұжымымызда бірге келді. Және қарап отырғанда да мына тұрғындар да хабарды естіп келіп жатыр екен. Бұл өте қуантарлық жағдай. Осы жақсы басталған науқанымыз табысты аяқталсын деп тілеймін.
Бүгін екпе алғандардың бірі - Гүлнара Тасболатова. Вакциналауға өз еркімен келді. Денсаулығым бірінші орында, әрі жақындарымның амандығына да бей-жай қарай алмаймын - дейді ол.
Гүлнара Тасболатова - облыстық мәслихат депутаты
Бүгін енді міне бұйыртып Спутник-В вакцинасын алдық. 30 минут дәрігерлердің бақылауында болдық. Күтіп отырдық. Ешқандай кері реакция болған жоқ. Осы вакцинаны қорықпай алыңыздар. Бұл сіздердің жақындарыңыздың, өзіңіздің денсаулықтарыңыз үшін өте маңызды.
Дәрігерлердің айтуынша да коронавирустық инфекциядан сақтанудың бірден-бір жолы вакцина алу.
Рыскүл Зинетова - Мұнайлы орталық аудандық ауруханасының аға-дәрігері
Енді әртүрлі әлеуметтік желідегі мәліметтерге көбіне халық көп көңіл бөліп соған сүйеніп, сенімсіздік туып жатыр ғой. Бірақ жұқпалы ауралардың алдын-алу біз тек вакцинация арқылы ғана тоқтата аламыз. Тек вакцинация ғана аурудан сақтайды. Сондықтан жаппай халықты вакцина алуға шақырамын. Қорқудың қажеттілігі жоқ. Барлығы да жеңіл түрде өтіп жатыр. Жалған ақпараттарға сенбеуді сұраймын.
Мөлдір Батырбай - тілші
Вакцинаның бірінші компонентін алғандар, енді 21 күннен кейін екінші компонентін алуы тиіс. Сонда ғана вирусқа қарсы тұрақты иммунитет толық қалыптасады дейді дәрігерлер. Бұған қоса, сақтық шараларын ұстанып, яғни бетперде тағып, арақашықтықты сақтау да өте маңызды.
Вакцина алуға ниетті кез келген адам тіркелген ауруханасы арқылы екпе қабылдай алады. Міндетті түрде жеке куәлігі болуы керек. Вакцинациядан кейін 30 минут дәрігердің бақылауында болады. Одан соң 3 күн учаскелік дәрігер қадағалайды. Вакцинациялау күні мен уақыты туралы СМС-хабарлама ұялы телефонға бір тәуліктің ішінде келеді. Екпе алғандарға арнайы сертификат беріледі.
Дереккөз mangystautv.kz
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
