©
Бауырлас түрік халықтарының қастерлі күндерінің бірі —Чанаккале соғысында жеңіске жеткен күн.
1915 жылы ағылшындар бастаған одақтас елдер Ыстамбұлды басып алу мақсатында Чанаккале (Дарданель) бұғазына кіру үшін шабуыл жасаған болатын. Жеңіспен аяқталған бұл соғыс Түркия тарихындағы ең қан төгісті, ең қайғылы және түрік халқының қаһармандық аңызына айналып, түріктердің ержүректігі мен батырлығын күллі әлемге паш етті.
Түркия Республикасының Ақтау қаласындағы Бас консулдығында «Tүркия Республикасының Ұлттық әнұранының 100 жылдығы (1921)», «1915 жылғы Чанаккале соғысының 106 жылдығы», «Чанаккале шейіттері мен шейіт Түрік диполматтарын еске алу» тақырыптарына арналған шара ұйымдастырылды. Карантин жағдайына байланысты арақашықтықты және гигиена талаптарын сақтай отырып өткізілген басқосуға Әзербайжан, Иран және Түрікменстан консулдары, Ақтау қаласындағы түрік және әзербайжан кәсіпкерлері, Ардагерлер ұйымы қоғамдық кеңесінің төрағасы Серікбай Төлетов қатысты.
Отаны үшін опат болған шейіттер құрметіне 1 минуттық үнсіздіктен кейін әнұран орындалып, шейіттер бұрышына гүл шоқтары қойылды.
Түркия Республикасының Ақтау қаласындағы Бас консулы Мұзаффер Ақйылдырым басқосуды кіріспе сөзбен ашып, Чанаккале соғысы туралы деректі фильмнен үзінді көрсетілді. Шара барысында Ақтауда тұрып жатқан Түркия азаматтарының балалары Чанаккале туралы түрікше өлеңдер оқыды. Ал Н.Жантөрин атындағы облыстық театрдың әртісі Қалима Наушабаева түрік халық әні «Чанаккале» мен қазақ халық әні «Алқоңырды» орындап қошаметке бөленді.
Маңғыстау облыстық «Бекет ата» мешітінің бас имамы Әнуар Елжанов шейіттерге арнап дұға оқыды. Шараға қатысушылар арнайы дастарханнан түрік дәмдерінен ауыз тиді, сурет көрмесіне қойылған Чанаккале соғысының ескі ақ-қара суреттерін тамашалап, соғыс жайымен тереңірек танысуға мүмкіндік болды.
Валентина ҚОЗЫБАҚОВА
Суреттерді түсірген Серік МАЙЕМЕРОВ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
