«Otpan logictics» ЖШС меншігіндегі «Маңғыстау-Ақтөбе» бағытында жүретін пойыз құрамының жолсеріктері вагондардың әбден ескіргенін айтып шағымданды, - деп хабарлайды mangystaumedia.kz.
«Темір арбалардың» сапасына жолаушылардың айтатын сынынан ұялатын жағдайға жеттік» деген бір топ жолсерік өз басшыларына қойған талабымызды орындата алмай келеміз дейді. Айтуларынша, рейске шығатын вагондардың сиқы нашар. Ал құмға айналып кеткен көмір тіпті жағуға келмейді дейді олар.
Жолаушыларды тасымалдайтын вагонымыз нашар, жарамайды. Мында келіп жағдайымызды участок бастығы Талғат Кәрібжановқа айтсақ бізбен тіпті сөйлеспейді. Бір сөз айтсаң адам есебіне алмайды. Бірдеңе болса "жұмыстан шығарамын" дейді. Нақты талабымыз бізді «Жолаушылар тасымалына» қайтарса, - дейді «Otpan logictics» ЖШС жолсерігі Бауыржан Сүйінов.
Бұл «Жолаушылар тасымалында» болмаған оқиға. Көмірді үйіндінің астынан қазып аламыз. Шынын айтқанда, біз Қарағандының шахтері болып кеттік. Кәрібжанов деген басшымыз өзінің командасын жинағысы келеді, - дейді «Otpan logictics» ЖШС жолсерігі Әлімбек Берекетов.
Сондай-ақ жолсеріктер учаске бастығының өздеріне қарата айтқан келемеж сөздеріне наразы. Жолсеріктер ел қатарлы артық істелген жұмыстың ақысын да, теміржолшылар күніне арналған мерекелік ақыны да алмадық деп шағымданып отыр. Ал басшылық болса бір рет жылдық ақы беретіндерін айтты.
Біз ешкімді жұмыстан шығарамыз деп жатқан жоқпыз. Кез келген мәселеде жолсеріктеріміздің шағымын тыңдаймыз. Министрлік те вагондарды жаңалауымыз керек екенін айтып жатыр. 2020 жылы күрделі жөндеуден өткен 11 вагонды сатып алдық. Жолаушыларды тасымалдайтын жаңа вагондарды алу үшін индустрия министрлігінің қаржыландыруы жөніндегі мәселе қазір қарастылып жатыр, - дейді «Otpan logictics» ЖШС директорының кеңесшісі Салтанат Сыздықова.
Сонымен қатар компания басшылығы учаске бастығы Талғат Кәрібжановтың өте талапшыл маман екенін, ал команданы компанияның өзі жинайтынын мәлімдеді. Ал Кәрібжанов расында келемеж сөздерді айтқан болса, оған міндетті түрде жаза қолданылады деді компания басшысы Алтай Борашев. Ал сапасы нашар көмір мәселесі бойынша мердігер мекеменің жіберген қателігі екенін мойындайды.
Алайда бір топ жолсерік «Маңғыстау-Ақтөбе» пойыз құрамы мемлекет меншігіндегі «Жолаушылар тасымалы» акционерлік қоғамына қайтарылуын сұрайды.
Махаббат НҰРЖАНҚЫЗЫ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
