Жаңаөзенде ерлікпен қаза тапқан полицейлердің құрметіне ескерткіш ашылды

Бүгін Жаңаөзенде ҚР Тәуелсіздігінің 30 жылдығына және полиция қызметкерлерінің мерекесіне орай «Рухани жаңғыру» бағдарламасы аясында қызмет атқару кезінде қаза болған полицейлердің құрметіне ескерткіш ашылды, - деп хабарлайды mangystaumedia.kz.

Ескерткіштің лентасы ресми түрде қиылып, гүл шоқтары қойылды. Салтанатты шара барысында Қазақстан Республикасының Мемлекеттік Туы әкеленіп, әнұран орындалды.

Орнатылған ескертіштегі есімдердің қатарында Үсен Құрбанов, Марат Бұхарбаев және Дүйсенбай Бисенкенов бар. Олар өздерінің саналы ғұмырын ішкі істер саласына арнаған, осы жолда құрбан болып кеткен асыл азаматтар.

Ескерткіштің ашылуына қала әкімі Мақсат Ибағаров, «Нұр Отан» партиясы Жаңаөзен қалалық филиалы төрағасының орынбасары Ж. Мұқанов, қалалық мәслихат депутаттары, полиция саласының ардагерлері, полиция қызметкерлері қатысты.

Жиналған көпшілік қызметтік борышын өтеу кезінде қаза болған тәртіп сақшыларын бір сәт үнсіздікпен еске алды. Ескерткіштің ашылу рәсімінде алғашқы болып сөз алған қала басшысы Мақсат Оңғарбайұлы аталған ескерткіш азаматтардың қауіпсіздігін қорғау мақсатында өз өмірін қиған полицейлердің рухына арналғанын және олардың отбасына алғыс айтты.

«Қоғамдық тәртіпті қалыптастыру, ел тыныштығын қорғау жолындағы қажырлы еңбектерін ескере отырып, қаза тапқандардың құрметіне орай ескерткіш орнатылып отыр. Бүгінгі ұрпаққа ұлағат, болашаққа аманат етуді мақсат еткен бұл нысан өткенге тағзым болары сөзсіз. Әрине, ерлікпен қаза тапқан батырларымызды ешбір ескерткішпен алмастыра алмаймыз. Елдің тыныштығы жолында жанын құрбан еткен ержүрек, батыл ерлер ешқашан ел жадынан шықпайды. Құрметті полиция қызметкерлері! Әрқашан анттарыңызға адал болып, ел қорғаны деген атаққа абыройлы қызмет ете беріңіздер! Еліміз тыныш, халқымыз аман, тәуелсіздігіміз тұғырлы болсын!», - деді қала әкімі Мақсат Ибағаров.

Маңғыстау облыстық полиция департаменті бастығының орынбасары Болатбек Ақшауов ескерткіштің мағынасына тоқталып, полиция қызметкерлерін құттықтады.

«Менің жолдасым Дүйсенбай Бисекенов бала кезінен полиция болуды армандаған. Ержеткен соң арманын іске асырып, ішкі істер органына жұмысқа орналасты. Ол 1994-2008 жыл аралығында адал еңбек етті. Біз 1995 жылы отау құрдық. Әрқашанда жұмысын бірінші орынға қоятын. Өте жақсы, адамгершілігі мол, сабырлы азамат еді. Маған адал жолдас, балаларына қамқор әке болды. 2008 жылы қызмет барысында қандықол қарақшылардың қолынан қаза тапты. Үлкен қызым Ләззат әкесінің жолын қуып, полиция капитаны болып ішкі істер басқармасында еңбек етіп келеді. Жолдасымның ерлігін ұмытпай, ескерткішке атын жазып, еңбегін бағалап, құрметтеп жатқан ұйымдастырушы азаматтарға алғыс айтамын»,- деді жұбайы Гүлшат Тәңірбергенова.

Гүлсім Оспан

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.