Көпбалалы аналар бүгін аз қамтылған және көпбалалы отбасыларға мектепке дайындық үшін әр балаға берілетін 25 мың теңгені алмадық деп облыстық әкімдіктен жауаптыларды іздеп барды, - деп хабарлайды mangystaumedia.kz.
Мектеп басшылығы да, әлеуметтік педагог те қаражат қандай жолмен тағайындалатынын дұрыс түсіндірмеді дейді аналар. Олар «Қыркүйектің жартысы өтті, әлі күнге дейін балалардың не киімі, не оқу құралы жоқ» деп ашулы.
Басқа мектептердегі біз сияқты отбасылар әр балаға 25 мың теңге алып жатыр. Бізге де сол ақша берілсін. Балаларымызды киіндірейік. Бәрі қымбат қазір, бар ақшамызбен оқушы балаларымызды киіндіре алмай отырмыз, - дейді көпбалалы ана Ақбөпе Бойдақова.
Мектеп бізге аз қамтылған отбасы екенімізді айтты. Мектептегілер бізге 25 мың теңгені алу үшін құжат тапсырыңдар деді. Енді құжатымызды қабылдап алған соң, құжат өтпей жатыр деп қоқысқа лақтырып тастайды, - дейді Сәуле.
Әкімдік алдында біраз шу шығарған аналармен қала әкімінің орынбасары тілдесті, бірақ мұндай мәселеден хабарсыз болып шықты. Жиын барысында білім бөлімінің басшысы бұл жағдайда құжаттарды дұрыс қабылдамаған мектептің кінәсі деп ашық айтты. Яғни, көпбалалы, аз қамтылған отбасы әуелі жұмыспен қамту орталығынан өзінің санатын дәлелдейтін анықтама алып мектепке тапсыру керек. Сонан соң әр балаға берілетін 25 мың теңгені алу жөнінде мектепке арыз жазу керек деп түсіндірді.
Бүгінгі таңда барлық білім беру ұйымдарында осы категорияға жататын аналарға толықтай қаражат бөлініп тұр. Тек осы ата-аналар өзінің санатын анықтап берген жағдайда ақша бірден аударылады, - Ақтау қалалық білім бөлімінің сектор меңгерушісі Тоты Күлметенова.
Бір топ ана бұл 25 мың теңгені көп баласы бар отбасының бәріне беру керек дейді. Ал білім бөлімінің басшысы Бағдат Сырымқызы қазан айының соңына дейін мәселе шешіліп, ақша толық беріледі деп сендірді.
Махаббат Нұржанқызы
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
