Шетпе халқы техникалық базаны көшіруді талап етеді

Шетпе ауылындағы Ащыбұлақ тұрғын массивінің тұрғындары үйлерінің тура іргесінде орналасқан техникалық базадан әбден мезі болған, деп хабарлайды mangystaumedia.kz.

Жүк көліктерін жөндейтін орын мен тұрғын үйдің арасы бар-жоғы жиырма метр. Осы екі ортадан өтетін ауыр техника жолдардың тоз-тозын шығарған. Соның салдарынан ел үш жылдан бері шаңнан көз ашпай, қысы-жазы тіпті терезені аша алмай қалған. Сонымен қоса, бұл ауылдың үлкені мен кішісі де аллергияға шалдыққанын айтады.

Солярка бар сияқты мұның ішінде. Денсаулығымызға, бала-шағамызға бәріне зиян бұл. База дәл түбінде тұрғанда тереземізді аша алмаймыз, - деді ауыл тұрғыны Гүлжан Түркменбаева.

Шілде айында "Адалдық алаңына" барған кезде бұл база бір айдың жобасында көшіріледі деді. Цемент заводтың маңынан базаға арналған жер беріледі деген еді. Міне қыркүйек айы болды, ешқандай өзгеріс жоқ, - деді ауыл тұрғыны Гүлбану Жаңбырбаева.

Халық базада жанар-жағармай да сақталады дейді. Оның қалдығы көшеге төгілген соң техникалық қауіпсіздік сақталмайтынын айтады. Ал экология департаменті техникалық база ауылдан қашыққа көшірілуі тиіс дейді. Десе де база өкілі, бүкіл құжат дұрыс әрі заңға сай жұмыс істеп жатырмыз дейді.

Әкімдіктен заводқа жақын маңнан жер беріңіз деп сұрадық. Өткенде барғанда мәселені жақында шешеміз деді. Шешіліп те қалған шығар, - деді "Евразия" техникалық базасының өкілі Берік.

Ал әкімдік халықтың ашуын туғызған базаны көшіру үшін жұмыс істеп жатқанын айтып отыр. Алайда, тұрғындар биліктің тым баяу әрекетіне наразы.

Ауылдың шетінен жер белгіленді. Қазір көшіру жұмыстарын дайындап жатыр. Себебі құр жерге көшуге мүмкіндігі жоқ. Газ бен тоғын тарту керек, сондықтан ұзаққа созылып жатыр, - деді Шетпе ауылы әкімінің орынбасары Аман Ордабаев.

Аман Ордабаевтың айтуынша, алғашында әкімдік ұсынған жер кәсіпкерге ұнамаған. Сондықтан басқа жер қарастырылып, көшіру жұмысы тұралап қалған. Ал тұрғындар бұл мәселе шұғыл түрде шешілмесе, облыс әкімі Нұрлан Ноғаевқа жеткіземіз деп отыр.

Махаббат Нұржанқызы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.