ДСМ Қоғамдық денсаулық сақтау ұлттық орталығы Басқарма төрағасының орынбасары, медицина ғылымдарының кандидаты Айнагүл Қуатбаева, эпидемиолог-дәрігер Марал Қадыр, облыс әкімінің орынбасары Гүлмира Қалмұратова «Қаламқасмұнайгаз» өндірістік басқармасының мұнайшыларымен кездесті. Кездесу барысында қызметкерлерге ел аумағында қолданылатын вакциналардың құрамы мен тиімділігі, олардың ағзаға әсері, вакцинацияға қарсы көрсетілімдері туралы толық ақпарат берілді.
Бізді үрейлендіретін нәрсе – адамдарда аурудың жасырын түрде жұғуы. Ол бастапқыда байқалмайды. Сондықтан адамдар кез келген жерде жүріп, ауруды өзгелерге де жұқтырып үлгереді. COVID-19 инфекциясын жасы үлкен адамдар ғана емес, балалар мен жасөспірімдер де жұқтырып жатыр. Сондықтан бұл инфекцияға қарсы бірден бір қару - вакцинация. Вакцина қауіпсіз. Екпе алу арқылы біз өзімізді ғана емес, жақындарымызды да қорғаймыз,- дейді Айнагүл Қуатбаева.
Сонымен қатар кездесуде Марал Жұмабекқызы халық арасында кеңінен таралып жүрген "Вакцина қауіпті", "Бедеу қылады", "Адам өмірін қысқартады" деген сынды пікірлердің шындыққа еш жанаспайтынын айтты.
Керісінше екпені салдыру арқылы иммундық жүйемізді нығайтып, қауіпті індетке қарсы тұра аламыз, - дейді Марал Жұмабекқызы.
Кездесу ары қарай Маңғыстау ауданы, Шетпе ауылында жалғасты.
Сонымен қатар, жиынға облыстық мәслихат депутаты Аббат Өрісбаев қатысты. Қазіргі таңда Маңғыстау аудандық ауруханасының жұқпалы аурулар бөлімінде 47 науқас емделіп жатыр. Науқастар санының өсуі 1 шілдемен салыстырғанда 2,8 есені құрап отыр. Үш науқастың жағдайы өте нашар. Жағдай осылай жалғаса беретін болса, алдағы уақытта ауруханадағы кереуеттің сыйымдылығы 150 төсекке дейін артады.
Қазіргі таңда облыста ковид ахуал күрделі. 637 науқас коронавирус инфекциясымен бүгінгі күні ауруханада жатыр. Олардың ішінде 36 бала, 72 аяғы ауыр және жас босанған аналар бар. Жансақтау бөлімінде 58 науқас жатыр. Оның 10-ы аса қатаң жағдайда, 48-і қатаң жағдайда. Барлығы да аппаратқа қосылған. Коронавирустың оң нәтижесімен үйдегі жағдайда 1 715 науқас ем алып жатыр.
Сондықтан ақ халаттылар халықты сақтануға, жиын-тойлар жасамауға және бармауға шақырады.
Айгүл Орынбаева
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
