Кендірлі ауылының іргетасы қаланды

Бүгін облыс әкімі Серікбай Трұмов Кендірлі ауылының іргетасын қалап, арнайы белгі қойды,-деп хабарлайды mangystaumedia.kz сайты.

Ауыл Кендірлі курорттық аймағынан 2 шақырым қашықта, Жаңаөзен қаласынан 63 шақырым жерде орналасады. Қазіргі таңда ауылдың бас жоспары дайындалып жатыр.

"Елді мекен құрылысын жүргізу, әлеуметтік нысандарды салу үшін алдымен жоспар қажет. Соған сәйкес облыс бюджетін нақтылау кезінде тиісті қаражат бөлінеді. Өздеріңіз білесіздер алдағы уақытта тәулігіне 50 мың текше метр су тұщытатын зауыт салынады. Су зауыты Жаңаөзен қаласы мен оған жақын маңдағы барлық ауылдың қажеттілігін толық қамтамасыз етеді. Сонымен қатар Жаңаөзеннен Кендірліге дейін төртжолақты жобасын жасау жоспарда бар. Бұл осы болашақ ауылға, демалыс аймағына қатынау үшін тиімді болмақ", - дейді облыс әкімі Серікбай Трұмов.

Осы ретте аймақ басшысы жауапты мамандарға ауылдың бас жоспарын әзірлеу кезінде жергілікті жердің ерекшелігін ескеруді ескертті. Айта кетейік, алдымен инфрақұрылым құрылысына көңіл бөлінеді, содан кейін ғана жеке тұрғын үй құрылысына жер бөлу басталады.

Егер ауылда халықтың қоныстануы артса, әлеуметтік нысандар өз деңгейінде болса әрі қарай аудан ретінде құрылуы мүмкін. Ол шамамен 7-9 ауылды қамтиды. Олардың арасында Рахат, Теңге, Бостан, Сенек және басқалары бар. Кендірлі ауданы 616 мың гектар аумақта орналасатын болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.