Жақсылық жаршысы болу - исламнан

Ақтау қалалық Бекет ата мешітінің қызметкерлері жағымды жаңалықтың жаршысы болды. ҚМДБ-ның "Ел үлесі - пәтерге" жобасының аясында 334-інші пәтерді Сайын ауылынан Марияш Жаймановаға тарту етті. Бұл туралы mangystaumedia.kz сайты Ақтау қалалық Бекет ата мешітінің баспасөз қызметіне сілтеме жасап хабарлайды.

Үш баланың анасы 15 жылдан бері үй жалдап тұрған көрінеді, ортаншы ұл Мирас сал ауруына шалдыққандықтан, жұмыс жасауға мүмкіндігі болмапты. "Зекет" қоры, Ақтау қалалық Бекет ата мешіті және ерікті де қайырымды азаматтардың қолдауымен алынған үш бөлмелі үйдің кілтін Марияш анаға Ақтаудың бас имамы Құрбанбек Абдалиев табыс етті.

⁃ Жалғызбасты ананың жағдайына бейжай қарай алмадық. Сал ауруына шалдыққан ұлының дертіне дауа іздеген Марияш ананы жолдасы қиын кезде қалдырып кетіпті. Ананы қолдау, балаға қол ұшын созу- баршамыздың парызымыз, - дейді Ақтау қалалық Бекет ата мешітінің бас имамы Құрбанбек Абдалиев.

Елімізде орын алған пандемия мен карантин ережелеріне қарамастан, Ақтау қалалық Бекет ата мешітінде ізгі істер жалғасын табуда. Қараша айында мешіт қызметкерлерінің ұйымдастыруымен азық-түліктер алынып, қайырымдылық шаралары өткізілді. Мешіт тізімінде тұрған 30 мұқтаж отбасына күнделікті тұтынатын күріш, секер, ұн, сұйық май және макарон өнімдері жеткізілді.

- Мешіт қызметінің бір бағыты- қайырымдылық жұмыстары болғандықтан, қызметкерлер бұл шараларға асқан жауапкершілікпен қарайды. Асыл дініміз барша мұсылман баласын ұдайы жақсылық жасауға шақырады. Қасиетті Құран кітабындағы "Бақара" сүресінде «Кімге қандай жақсылық жасаған болсаңдар, Алла тағала оны шүбәсіз біледі» делінген. Ал, "Зілзала" сүресінде «Кімде-кім мысқалдай жақсылық жасаса, соның қарымын алады» делініп, жақсылық жаршыларын жоғары қойған, - дейді Ақтау қалалық Бекет ата мешітінің бас имамы Құрбанбек Абдалиев.

Қазір мешіттің бас имамының бастамасымен, Ақтау қалалық Бекет ата мешітінің алдында 2013 жылдан бері қайыр сұрап отырған бірнеше жанның мәселесін шешіп, олардың қалыпты өмірге қайта оралуына көмектесу үшін игі шаралар қолға алынуда. Тағдырдың тәлкегімен, отбасынан береке кетіп, көшеде алақан жайып күн көруге мәжбүр болған бұл жандардың жағдайлары нашар, мұқтаж күйге түскен.

- Бұл азаматтарды тығырықтан шығару үшін міндетті түрде жұмыстанатын боламыз, бірақ оған біршама уақыт кетеді. Уақыт, сағат ол кісілердің мойнындағы ауыртпалық жүгін еселей түсуде. Қайырымды жандарды сауапты іске жәрдемші болуға шақырамын. Өмір жолдарында сәтсіздіктерге кезігіп, коммуналдық қызметтер мен пәтерақысын төлей алмай, қарызға батқан.Қайыршылық қажытқан мұқтаж жандар қарыздары жабылса, алдағы уақытта өзгеге алақан жаюды тоқтатып, қалыпты жұмысқа кіруге келісіп отыр, - дейді Қүрбанбек Абдалиев.

Бүгінде Ақтау мешітінің маңын жағалап, Алланың үйі алдында қайыр сұрап, күнелтіп жүрген Ә. есімді азаматшаның банктен алынып, төленбей қалған несиесі жабылды. Енді оның коммуналдық қызметтерге қарызын өтеу керек. Бұл қиындықтан құтылса, екі баланың анасы жаңа өмір бастауға құлшынып отыр. Мешіт алдында күнделікті қайыр сұрап тұратын Ө. есімді азамат осыдан 5 жыл бұрын Өзбекстаннан Ақтауға қоныс аударған. 2016 жылы миына қан құйылып, денсаулығы нашарлап кеткенде, жақындары жан-жаққа кетіпті. Сол жылы құжаттарын да жоғалтқан. Ақтаудың бас имамы бұл азаматтың құжаттарын түгендеп, реттеп беруге көмектесті. Сондай-ақ, беріліп, оның 3 айлық пәтерақысы төленді. Бас имамның айтуынша, қайыршылықпенен күнелтіп жүрген жандардың мәселелерін түпкілікті шешіп, оларды қалыпты тұрмысқа қайтару үшін жұмыс жалғаса беретін болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.