Қазір өңірде тұтынған электр қуатының қарызы 2 миллиард теңгеден асты. Бұл туралы Маңғыстау облысы әкімінің орынбасары Бекбол Орынбасаровтың төрағалығымен өткен жиын барысында «Маңғыстау жарық» ЖШС директоры Ермек Давлетпақов айтты, - деп хабарлайды mangystaumedia.kz сайты.
Жиында коммуналдық мәселелер, көпқабатты тұрғын үйлерді басқарудың жаңа түріне көшіру және алдағы 2022-2023 жылдардағы жылу беру маусымына дайындық мәселелері талқыланды. Шараға басқарма басшылары, қала, аудан әкімдері мен меншік иелері қауымдастығының мүшелері қатысты.
«Маңғыстау жарық» ЖШС директоры Ермек Давлетпақов облыстың негізгі борышкерлері мемлекеттік мекемелер мен кәсіпорындар екенін айтты. Оның айтуынша, мәселені сотқа дейінгі тәртіпте шешу ештеңені өзгертпеген. Осыған байланысты компания биыл маусым айынан бастап борышкерлердің нысандарын электр энергиясынан ажырату туралы шешім қабылдады.
– 2022 жылдың 30 сәуіріндегі жағдай бойынша облыстағы тұтынушылық қарыз 2 миллиард теңгеден асады. Негізгі борышкерлер – мемлекеттік мекемелер мен кәсіпорындар. Мерзімі өткен берешегі бар тұтынушыларға биыл 25 мамырға дейін төлеу ұсынылып отыр. Қарыз өтелмеген жағдайда 1 маусымнан бастап борышкерлерге нысандарды электр желісінен ажырату түріндегі шектеулер енгіземіз, – деді Ермек Давлетпақов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
