«Ерекше жандардың сәттілік синергиясы» деп аталатын жоба - Орта Азиядағы азаматтық қоғамды қолдау аясында жүзеге асырылды. Бұл туралы «Ұрпақ next» қоғамдық қорының басшысы Гүлжанат Мұратбай мәлім етті, деп хабарлайды mangystaumedia.kz сайты Маңғыстау облысының қоғамдық коммуникация орталығына сілтеме жасап.
Оның айтуынша, Еуразия қоры үкіметтік емес ұйымдардың әлеуетін көтеру мақсатында арнайы грант бөліп, Маңғыстаудан «Ұрпақ Next» қоғамдық қоры жеңімпаз атанды.
«Жоба қазан айынан бастап 2021 жылдың сәуір айына дейін жүзеге асады. Жобаның мақсаты - мүмкіндігі шектеулі әйелдерді жұмыспен қамтып және кәсіпкерлікпен айналысуға көмектеседі. Бұған 18 бен 45 жас аралығындағы өңірде тұратын мүмкіндігі шектеулі қыз –келіншектер мен ерекше бала тәрбиелеп отырған аналар қатыса алады», деді Гүлжанат Мұратбай.
Жоба аясында мамандар мүмкіндігі шектеулі қыз-келіншектерге құрақ құрау, кондитерлік, визажист, SMM маманы бойынша онлайн курс өткізеді. Кейін курсқа қатысушылар өз кәсібін ашу, басқару, маркетинг, сату, жеке брендті қалыптастыру, әлеуметтік желілілерді тиімді пайдалану, мемлекеттік бағдарламалар мен субсидия алу секілді тақырыптарды қамтыған бизнес курсынан өтеді.
Айта кетейік, Маңғыстау облысында 27 481 мүмкіндігі шектеулі адам тұрады. Оның 56% еңбекке қабілетті.
Қор жетекшісінің айтуынша, басты мақсат нәтижелі жұмыспен қамту бағыты болғандықтан, тұрғылықты жерде жұмысқа орналасуға немесе өз кәсібін ашуға, қоғамдық қор мүмкіндігінше ықпал етеді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
