Облыста үш күнде 256 нысанға рейд жасалды

Маңғыстау облысындағы эпидемиологиялық жағдайдың күрт нашарлап кетуіне байланысты 30 шілде мен 2 тамыз аралығында аймақтағы мониторинг топтар күшейтілген режимде жұмыс істеді, деп хабарлайды mangystaumedia.kz.

Түнгі рейд барысында бүгінге дейін бірнеше рет Маңғыстау облысының бас мемлекеттік санитариялық дәрігерінің қаулысын өрескел бұзған «Н2О» түнгі клубы тексерілді. Мониторинг топ мүшесі Анар Шамшадинованың айтуынша, осы клубта концерттың өтетіндігі жөнінде афиша тарап, уатсап желісі арқылы клуб ішіндегі видеолар келген. Мониторингтік топ ғимаратқа барған кезде далада қатты музыканың дауысы естіліп тұрған. Алайда, күзетшілер оларды ішке кіргізбей үш сағат далада күткізген.

«31 шілде күні мониторинг топпен бірге «Н2О» түнгі клубына бардық. Сол кезде есіктері тарс жабық тұрды. Іште қатты ойнаған музыканың дауысы естілді. Қолмен ұстағанда есік дірілдеп, іштегі жайдан хабар беріп тұрды. Ең өкініштісі, клуб қызметкерлері мониторинг топ мүшелерін көре тұра, ешқандай жауап бермей, елемеуі ұят нәрсе. Ең соңында құзырлы орган өкілдері келіп, есікті еріксіз ашуға тура келді. Себебі, мониторинг топ мүшелеріне іште көңіл көтеретін шаралардың өтіп жатқандығы туралы хабарламалар келіп жатты. Алайда ішке кіргенімізде адамдарды көре аламадық. Олар біз сыртта тұрған уақыттың ішінде адамдарды жасырып, басқа есіктер арқылы шығарып жіберген. Біз есікті неге ашпадыңыздар дегенде естімедік деп жауап берді. Біз 5 минут есік қағып, ашпағаннан кейін ғана құлыпты бұзған жоқпыз. 3 сағат есік алдында тұрғаннан кейін есікті бұзуға тура келді», - деді Анар Шамшадинова.

Айта кетейік, мониторингтік топтар соңғы үш тәулікте облыс бойынша 256 нысанға рейд жасады. Нәтижесінде карантин талаптарын сақтамаған 57 кәсіпкерге әкімшілік хаттама толтырылды. Оның ішінде 47 кәсіпкерлік нысан Ақтау қаласының аумағында орналасқан.

Айта кетейік, карантин талаптарын бұзғандарға мониторинг топтың хаттамасы негізінде ҚР Әкімшілік Кодексінің 425 бабы бойынша жеке тұлғаға 40 АЕК көлемінде айыппұл салу қарастырылған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.