Чемпиондар шыққан Сайында спорт кешені қашан салынады?

Біраз бұрын Жандос есімді сайтымыздың сайындық оқырманынан хат келген еді. Хат мазмұны  Сайын Шапағатов ауылына спорт залы мен мәдениет үйі қажеттігі жайында. Бұл ошақтардың болмауы ауылдың талапты, ынталы тұрғындарына қолайсыздық әкелетінін жазған. Түсініктірек болуы үшін оқырман сөзін сол күйінде ұсынайық: «Сәлеметсіз бе? Неге басқа кішкентай ауылдарға қарағанда Сайын Шапағатов елдімекенінде Мәдениет үйін, Спорт комплексін салмайды екен? Мен өзім спортпен айналысамын, бірақ біз тек мектепте жаттығамыз. Соған қарамастан ауылымыздан бірнеше чемпион шығып жатыр. Бізге спорт зал мен Мәдениет үйі керек, өтініш осыны шығарыңызшы», - делінген хатта. Біз осы мәселе бойынша Түпқараған ауданы әкіміне хабарласқан едік. Әкімдіктің баспасөз хатшысы Е.Дүйсенов хат авторына, жалпы ауыл тұрғындарына жағымды жаңалықпен бөлісті. «Алдымен, аталмыш тұрғынға ауылдың мәдени және спорттық тұрғыда дамуы мен өркендеуіне бей-жай қарамай, жанашырлық танытқаны үшін алғыс айтқым келеді. Екіншіден, тұрғын көтерген екі мәселенің де оң шешім тапқандығын, биылғы 2019 жылы екі мәселенің де толықтай шешілетіндігін айтқым келеді», - деген ол аталған екі нысанның да құрылысы қолға алынғанын жеткізді. «Ауыл мәдениетін көтеріп, мәдени-көпшілік шараларды өз деңгейінде өткізу үшін Мәдениет үйіне жер орыны белгіленді. Қазіргі таңда жобалау-сметалық құжаттамасын жасақтауға 400 мың теңге бөлінді. Жұмысты аяқтау үшін қосымша 17, 685 млн. теңге қажет. Мердігер мекеме - «ҚазақЖобалауҚұрылыс» ЖШС", - дейді Е.Дүйсенов. «Мемлекеттік-жекеменшік әріптестігі аясында бірге «Дарабоз» ЖШС бастамасымен ашық футбол алаңы бар әмбебап спорт кешені салынады. Спорт кешенінің құрылысы 2019 жылдың ортасына дейін аяқталып, пайдалануға беру жоспарлануда», - деді баспасөз хатшысы.

Теңге БЕКМҰРЗАЕВА

Суреттерді Түпқараған ауданы әкімінің баспасөз қызметі ұсынды