Маңғыстаулық екі дзюдошы ұлттық құраманың оқу-жаттығу жиынына қатысты

Дзюдодан Қазақстан ерлер ұлттық құрама командасының оқу-жаттығу жиыны аяқталды. Ұлттық құрамада маңғыстаулық спортшы Бауыржан Нарбаев пен Руслан Мұсаев та бар, - деп хабарлайды mangystaumedia.kz сайты.

Оқу-жаттығу жиыны Алматы облысындағы «Ақбұлақ» спорт базасында өткен. Оған 20-ға жуық спортшы қатысты.

«Жаттығу жиыны өзіміз ойлағандай өте жоғары деңгейде өтті. Карантиннен кейінгі алғашқы жаттығуымыз болғандықтан спортшыларға артық салмақ салынбады», - дейді Ұлттық құраманың бас бапкері Айдын Смағұлов.

Дзюдодан ұлттық құраманың мүшесі, маңғыстаулық спортшы Бауыржан Нарбаевтың айтуынша, оқу-жаттығу жиыны әдеттегіден жеңіл өткен.

«Оқу-жаттығу жиыны барысында бас бапкердің нұсқауымен футбол, баскетбол сынды спорттық ойындарды ойнадық. Сондай-ақ тауға шығу, жүру жаттығулары арқылы дайындығымызды шыңдадық. Үш ай үзілістен кейін жиналған соң спортшылардың жарақат алмауы маңызды болды. Сондықтан да жеңіл спорттық шаралар ұйымдастырылды», - деді Бауыржан Нарбаев.

Дзюдодан Қазақстан ерлер ұлттық құрама командасының келесі оқу-жаттығу жиыны AIBA бокс академиясында өтеді. Жаттығу жиыны 1 шілде күні басталып, 18 шілде күні аяқталады деп жоспарланып отыр.

Айта кетейік, оқу-жаттығу жиыны 8 маусым күні басталған болатын. Жиын 20 маусымға дейін жалғасқан. Сонымен қатар спортшыларды ұлттық құраманың дәрігері жіті бақылап, барлық санитарлық талапты қатаң сақтаған.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.